Nos conventus monasterii Sancti Martini de Sacro Monte Pannonie memorie commendamus, quod Sebastianus filius Nicolai de villa Taryan, de cuius noticia Paulus dictus Deak de Alsuk familiaris noster nos assecuravit personaliter coram nobis constitutus proposuit viva voce, quod ipse quandam vineam suam in territorio possessionis nostre Kystaryan vocate, inter arabilem terram ab oriente et inter viam magnam ab occidente, item inter vineas Benedicti filii Andree de Lazy a meridie ac Andree filii Andree de dicta Kystaryan ab aquilone sitam, cum suis pertinenciis Iohanni filio Iacobi nunc in Papa commoranti et domine Elisabeth relicte Dominici filii Iohannis, iobagionis ecclesie de Beel, fratris sui similiter personaliter coram nobis astantibus pro quadam alia vinea sibi per ipsos in forma concambii mediantibus aliis nostris litteris tradita dedisset et assignasset, ymmo dedit et assignavit nostri in presencia assumpmens eos in eadem vinea pacifice contra quosvis homines propriis conservare laboribus et expensis. Ita sane, quod predictus Iohannes filius Iacobi et sui heredes utriusque sexus medietatem predicte vinee in perpetuum valerent possidere, domina vero Elisabet supradicta pro refrigerio anime dicti Dominici mariti sui vita sibi comite valorem seu precium alterius medietatis dicte vinee sibi sequestrate pro opere seu fabrica ecclesie Sancti Regis Ladislai in dicta Taryan existentis impendere teneretur, quod si non faceret, tunc post mortem eius eadem medietas vinee eidem ecclesie Sancti Regis Ladislai remaneret perpetuo possidenda pro eadem ecclesia decoranda. Datum in festo Beati Nicolai episcopi, anno Domini Mo CCCCo quarto.||
[Hátán:] Pro Iohanne filio Iacobi et domina Elisabet