Nicolaus de Gara, regni Hungarie palatinus etc., dilectis nobis nobilibus viris Laurentio de Swr, Georgio de Bokod nostris, necnon viri magnifici domini Iohannis de Gara, fratris nostri carissimi, castellanis in castro Cesnek constitutis et existentibus salutem et dilectionem. Noveritis, quod religiosus vir frater Franciscus, prior claustri Beati Mauricii de Beel in persona reverendissimi in Christo patris et domini domini Andree, archiepiscopi Collocensis, gubernatoris abbatie dicte claustri, nobis exposuit, quomodo vos ratione venationis seu captionis ferarum et capriolorum iobagiones dicte abbatie in possessione Kayar vocata residentes molestare, perturbare et dampnificare niteremini. Et, quia vos attenta suplicatione eiusdem fratris Francisci nobis nomine prefati domini Andree archiepiscopi porrecta excessus eorumdem populorum, si quos ratione venationis et captionis capriolom (!) et ferarum incurrerunt, ob reverentiam dicti domini Andree archiepiscopi gratiose indulsimus, ideo vestre dilectioni serie presentium firmis damus in mandatis, quatenus memoratos populos et iobagiones iam dicti domini Andree archiepiscopi in dicta possessione Kayar residentes pretextu venationis ferarum, ut premissum est, dampnificare, impedire et molestare nullatenus presumpmatis; aliud sub obtentu nostre dilectionis facere non velitis; presentes perlectas reddi edicimus presentanti. Datum Iaurini, sabbato proximo post festum Beati Iohannis ante portam Latinam, anno Domini millesimo quadringentesimo septimo decimo. [1417. máj. 8.]