Serenissimo principi domino Sigismundo, Dei gracia Romanorum regi semper augusto ac Hungarie, Bohemie, Dalmacie, Croacie etc. regi, domino ipsorum naturali conventus monasterii Sancti Martini Sacri Montis Pannonie oraciones in Domino. Vestra noverit serenitas nos litteras vestras sumpma cum obediencia recepisse in hec verba:||
Sigismundus, Dei gracia Romanorum rex semper augustus ac Hungarie, Bohemie, Dalmacie, Croacie etc. rex fidelibus suis, conventui ecclesie Sancti Martini Sacri Montis Pannonie salutem et graciam. Dicitur nobis in personis religiosorum virorum domini fratris Michaelis abbatis monasterii de Beel in silva Bokon existentis et conventus loci eiusdem, quomodo nobilis domina Katherina vocata, relicta condam Benedicti filii Nicolai de Debrenthe ac Thomas, Basy, Emericus, Ladislaus et Iohannes dicti Hym filii eiusdem Benedicti una cum Anthonio de Takach, Georgio dicto Beken de Koachy et Georgio de Koltha castellanis et familiaribus ipsorum circa festum Beati Gerhardi martiris, cuius iam secunda instaret revolucio annualis, ad possessionem Ganna vocatam dictorum abbatis et conventus veniendo unum bovem Anthonii villici de eadem Ganna ad castrum eorum Debrenthe omni sua sine culpa deduxissent, quem sepe eidem reddere et restituere promisissent, nunquam tamen eundem restituissent; hiis non contenti similiter anno proxime elapso circa festum Beati Michaelis archangeli proxime preteritum modo simili ad dictam possessionem Ganna noctis in silencio venientes tres cophinos apum cum eisdem apibus abstulissent de domo Anthonii villici supradicti, quos eidem ad plurimas peticiones eiusdem minime restituissent. Item malum malo accumulare non formidantes similiter anno proxime nunc preterito circa festum Beati Galli abbatis et confessoris proxime elapso ad ipsam possessionem Ganna vocatam hostiliter irruendo, similiter unum bovem Iohannis Fabri, in eadem Ganna commorantis abduxissent ac de orto Stephani filii Laurencii de eadem confractis prius portis eiusdem fenum eiusdem ibidem repertum cum oneratis curribus ad dictum castrum ipsorum Debrenthe deduci fecissent potencia ipsorum mediante in preiudicium dictorum abbatis et conventus valde magnum. Super quo fidelitati vestre firmiter precipiendo mandamus, quatenus vestrum mittatis hominem pro testimonio fidedignum, quo presente Iacobus de Sumwyrag aut Mathyas de Bedege sin Dominicus vel Franciscus de Gych neve Michael ceu Nicolaus de eadem vel Iohannes Parvus de Iuthas an Nicolaus dictus Konth de eadem aliis absentibus homo noster ab omnibus, quibus incumbit, de premissis experiatur veritatem, quam tandem nobis fideliter rescribatis. Datum octavo die festi Beati Iohannis Baptiste, anno Domini Mmo CCCCmo vigesimo secundo.||
Unde nos preceptis vestre serenitatis in omnibus obedire cupientes, ut tenemur, una cum predicto Francisco de Gych, homine vestro nostrum hominem, videlicet religiosum virum fratrem Mathiam sacerdotem unum ex nobis ad premissam inquisicionem faciendam pro testimonio transmisimus fidedignum, qui tandem exinde ad nos regressi nobis concorditer retulerunt, quomodo ipsi sabbato proximo ante festum Beate Margarethe virginis et martiris proxime preteritum in comitatu Wesprimiensi simul procedendo a nobilibus et ignobilibus ac alterius cuiusvis status et condicionis comprovincialibus dicti comitatus Wesprimiensis hominibus, a quibus decens et oportunum fuisset, palam et oculte diligenterque inquirendo omnia premissa et quevis premissorum singula sic et eatenus perpetrata esse rescivissent, quemadmodum vestre dictum extitisset serenitati et tenor per omnia continet litterarum vestrarum prescriptarum. Datum quarto die inquisicionis antedicte, anno Domini supradicto.||
[Hátán:] Domino regi, pro religiosis viris domino fratre Michaele, abbate monasterii de Beel in silva Bokon existentis et conventu loci eiusdem inquisicionis relacio.