Serenissimo principi domino Sigismundo, Dei gracia Romanorum regi semper augusto ac Hungarie, Bohemie etc. regi, domino ipsorum naturali conventus monasterii Sancti Martini Sacri Montis Pannonie oraciones in Domino. Vestra noverit serenitas nos litteras vestras sumpma cum obediencia recepisse in hec verba:||
Sigismundus, Dei gracia Romanorum rex semper augustus ac Hungarie, Bohemie etc. rex fidelibus suis, conventui ecclesie Sancti Martini Sacri Montis Pannonie salutem et graciam. Dicitur nobis in personis religiosorum virorum, domini fratris Michaelis, abbatis monasterii de Beel et conventus loci eiusdem, quomodo religiosus vir dominus frater Andreas, abbas monasterii Beate Virginis de Sirch una cum Dominico de Beren, Marco de Nagthewel, Paulo Clavigero, Benedicto de Symigyo, Demetrio, Michaele filio Bartholomei de Soly et Georgio iudice de Sirch, Thoma Way dicto de Dudar, Benedicto Parvo, Nicolao Chawez, Stephano Wage de Sirch familiaribus et iobagionibus suis circa Carnisprivium, cuius secunda instaret revolucio annualis, dum predictus dominus abbas venatores suos venatum admisisset repertumque ac venatum quendam cervum usque ad quandam piscinam in dicta Sirch habitam investigassent et dum eundem investigatum prendere voluissent, tunc predictus dominus Andreas abbas una cum predictis familiaribus et iobagionibus suis ipsum cervum cum duobus canibus ad monasterium suum depulisset; similiterque circa festum Epiphaniarum Domini proxime elapsum dum dictus dominus Michael abbas et suus conventus per venatores suos canibusque propriis similiter quendam cervum versus Sirch iuxta quandam arborem in frustra decidissent ac pro quodam vectigali ivissent, ut dictum cervum ad monasterium dictorum domini Michaelis abbatis et conventus deducere voluissent, tunc medio tempore tunc predictus dominus Andreas abbas cum predictis familiaribus et iobagionibus suis ipsum cervum sic in frustra decisum ad predictum monasterium suum deportari fecisset potencia sua mediante in preiudicium dictorum domini abbatis et sui conventus valde magnum. Super quo fidelitati vestre firmiter precipiendo mandamus, quatenus vestrum mittatis hominem pro testimonio fidedignum, quo presente Urbanus de Bedege, Iohannes et Mathyas de eadem sin Franciscus, Georgius, Dominicus filii Michaelis de Gich aliis absentibus homo noster ab omnibus, quibus incumbit, meram de premissis experiatur veritatem scitaque premissorum mera veritate evocet prefatum dominum Andream abbatem contra annotatos abbatem et conventum de Beel nostram in presenciam ad teminum competentem racionem de premissis reddituros, predictos iobagiones et familiares suuos eidem statuere committendo litis pendencia, si qua foret inter ipsos, non obstante. Et post hec ipsius inquisicionis et evocacionis seriem cum nomine evocatorum terminoque asignato nobis fideliter rescribatis. Datum Bude, post Nativitatem Virginis gloriose, feria sexta immediate sequenti, anno Domini millesimo quadringentesimo XXo secundo.||
Unde nos mandatis vestre serenitatis in omnibus obedire volentes, ut tenemur, una cum prefato Dominico de Gich homine vestre serenitatis nostrum hominem, videlicet religiosum virum, fratrem Nicolaum sacerdotem, unum ex nobis ad prescripta peragenda nostro pro testimonio transmisimus fidedignum, qui demum exinde ad nos reversi nobis uniformiter retulerunt, quod ipsi in festo Beati Luce ewangeliste proxime preterito in comitatu Wesprimiensi simul procedendo a nobilibus et ignobilibus ac alterius cuiusvis status et condicionis ac comprovincialibus dicti comitatus hominibus, a quibus decens et opportunum fuisset, pallam et oculte diligenter inquirendo omnia premissa et quevis premissorum singula sic et eatenus facta esse rescivissent scitaque premissorum mera veritate sequenti die, die festi Undecim Milia Virginum proxime preteriti predictum dominum Andream abbatem de Sirch in theloniaria porcione sua in Iaurino habita domoque thelonaria ibidem habita contra annotatum dominum Michaelem abbatem de Beel ad octavas festi Omnium Sanctorum proxime affuturas vestre maiestatis evocassent in presenciam, predictos familiares et iobagiones ipsius domini abbatis de Sirch eidem statuere committendo litis pendencia, si qua foret inter ipsos, non obstante. Datum quinto die ulterioris termini prenotati, anno Domini supradicto.||
Hátán: Domino regi pro religioso viro domino fratre Michaele abbati de Beel et contra religiosum virum dominum fratrem Andream, abbatem de Sirch inquisicionis et ad octavas festi Omnium Sanctorum evocacionis relacio.||
Nicolaus de Gych homo regius.