Serenissimo principi domino Sigismundo, Dei gracia Romanorum regi semper augusto ac Hungarie, Bohemie, Dalmacie, Croacie etc. regi, domino ipsorum metuendo conventus Sancti Martini de Sacro Monte Pannonie oracionum suffragia devotarum. Litteras vestre maiestatis nobis directas noveritis nos suprema cum obediencia recepisse in hec verba:||
Sigismundus, Dei gracia Romanorum rex semper augustus ac Hungarie, Bohemie, Dalmacie, Croacie etc. rex fidelibus suis, conventui ecclesie Sancti Martini Sacri Montis Pannonie salutem et graciam. Dicitur nobis in personis religiosi viri domini fratris Michaelis abbatis et conventus monasterii de Beel, quomodo religiosus vir frater Andreas abbas de Sirch, nescitur, quo ductus spiritu, missis et destinatis nonnullis iobbagionibus suis, videlicet Benedicto Parvo, Nicolao Tawiz, Stephano Vago, Nicolao filio Ladislai, Paulo Vein dicto, Emerico, Briccio filio Nicolai, Demetrio, Iacobo, Petro, Iohanne Hercheg dicto, Iohanne Nemes, Georgio filio Zebewk, Petro Thimar, Michaele filio Nicolai, Nicolao filio Thome, Petro filio Iacobi, Chozma filio Demetrii, altero Cozma Sclavo, Georgio Sclavo, Mathia Renes dicto, Gallo villico, Ladislao filio Georgii, Laurencio filio Stephani, Clemente filio Petri, Georgio Nicolai, Valentino filio Georgii, Nicolao Pangracz dicto, Nicolao Veres, Petro Carpentario, Simoni filio Dominici, Bartholomeo filio Michaelis, Nicolao filio Pauli, Stephano filio Wida, Francisco Doleatore, Stephano filio Ladislai, Dominico, Benedicto Nigro, Iohanne, Georgio Yweg, Iacobo, Thoma Waramo, Demetrio dicto Melary populis et iobagionibus de dicta Chirch cum quodam subulco porcorum suorum in anno, cuius iam tercia instaret revolucio annualis, circa festum Sancti Martini tunc preteriti dicti iobagiones ipsius abbatis feneta dictorum domini abbatis et conventus de Beel ac prata ad possessionem ipsorum Akol vocata spectantes defalkari et per currus ipsorum conculcari et anihilari, similiter primis dampnis illatis non contenti, modo simili ipsas iniurias reiterando proximo sequenti anno plura, quam primo perpetrassent, necnon per porcos suos ad fruges iobagionum suorum ac eciam propriorum ipsorum domini abbatis et conventus in facie dicte possessionis Akol vocate cretorum ad septuaginta sex kapeciarum se extendencium dampna inferri fecisset potencia sua mediante in preiudicium dictorum domini abbatis et sui conventus valde grande. Super quo fidelitati vestre firmiter precipiendo mandamus, quatenus vestrum mittatis hominem pro testimonio fidedignum, quo presente Urbanus de Bede, Iohannes, Mathyas de eadem sin Dominicus, Franciscus, Georgius filii Michaelis de Ghich aut Nicolaus de eadem sin Iohannes Parvus vel Nicolaus Konth de Iwtas sin Nicolaus de eadem Iwtas aliis absentibus homo noster ab omnibus, quibus incumbit, meram de premissis experiatur veritatem scitaque premissorum mera veritate evocet prefatum Andream abbatem contra annotatos abbatem et conventum de Beel nostram in presenciam ad terminum competentem racionem de premissis reddituros, predictos iobbagiones suos eidem statuere committendo litis pendencia, si qua foret inter ipsos, non obstante. Et post hec ipsius inquisicionis et evocacionis seriem cum nomine evocatorum terminoque assignato nobis fideliter rescribatis. Datum Bude, post Nativitatem Virginis gloriose, feria sexta immediate sequenti, anno Domini millesimo quadringentesimo vigesimo secundo.||
Unde nos mandatis vestre serenitatis in omnibus obedire cupientes, ut tenemur, una cum prefato Georgio de Gych homine vestre serenitatis nostrum hominem, videlicet religiosum virum, fratrem Nicolaum sacerdotem, unum ex nobis ad prescripta peragenda nostro pro testimonio transmisimus fidedignum, qui tandem exinde ad nos reversi nobis uniformiter retulerunt, quod ipsi in festo Beati Luce ewangeliste proxime preterito in comitatu Vesprimiensi simul procedendo a nobilibus et ignobilibus ac alterius cuiusvis status et condicionis comprovincialibus dicti comitatus hominibus, a quibus decens et oportunum fuisset, palam et oculte diligenter inquirendo omnia premissa et quevis premissorum singula sic et eatenus facta esse rescivissent scitaque premissorum mera veritate sequenti die festi Undecim Milia Virginum proxime preteriti predictum dominum Andream, abbatem de Cyrch in theloniaria porcione sua in Iaurino habita domoque theulonaria contra anotatum dominum Michaelem, abbatem de Beel ad octavas festi Omnium Sanctorum proxime affuturas vestre maiestatis evocassent in presenciam predictosque iobbagiones ipsius domini abbatis de Cyrch eidem statuere committendo litis pendencia, si qua foret inter ipsos, non obstante. Datum quinto die ultimi termini prenotati, anno Domini supradicto.||
[Hátán:] Domino regi Pro religioso viro domino fratre Michaele, abbate de Beel contra religiosum virum, dominum fratrem Andream, abbatem de Sirch inquisicionis et ad octavas festi Omnium evocacionis relacio.