Nobili viro domino Gregorio dicto Waryw de Meger, vicecomiti comitatus Iauriensis conventus monasterii Sancti Martini Sacri Montis Panonie amiciciam paratam cum honore. Vestra noverit amicicia nos litteras vestras citatorias honore, quo decuit, recepisse in hec verba:||
Amicis suis reverendis, conventui ecclesie Sancti Martini Sacri Montis Panonie Gregorius dictus Waryw de Meger, vicecomes comitatus Iauriensis amiciciam paratam cum honore. Noveritis, quod cum iuxta continenciam litterarum vestrarum citatoriarum et vestre amicicie nobis exinde relatoriarum pro religioso viro domino fratre Michaele abbate de Bel, pro quo Franciscus de Gych cum procuratoriis litteris vestris astiterat, super factis in eisdem litteris vestris contentis contra Iohannem Tewely officialem Blasii Baruth de Kyspech ac iobagiones eiusdem Blasii in eadem Kyspech commorantes ipsi Blasyo statuere committendo sabbato proximo post festum Conversionis Beati Pauli coram nobis accionem domini abbatis audire tenebantur, qui Iohannes Tewely pro sua parte conparuerat, pro prefatis vero Blasio Baruth et iobagionibus non venerunt, neque miserunt, sed se in byrsagiis consuetis, prout in aliis litteris nostris continentur, fore convincendos et quia ipse Blasius Baroth secundario citari videbatur nostri in presenciam prefatosque iobagiones suos statuere committendo, pro eo vestram requirimus amiciciam, quatenus vestrum mittatis hominem pro testimonio fidedignum, quo presente Emericus Teremes de Pech aut Petrus filius Georgii vel Dominicus frater eiusdem de eadem aliis absentibus homo regius citet Blasium Baroth iobagionesque suos in aliis vestris contentos eidem statuere committendo contra dominum abbatem de Bel nostram in presenciam ad sabbatum proximum post festum Beati Blasii ad accionem eiusdem domini abbatis responsurum et post hec huiusmodi citacionis seriem nobis amicabiliter rescribatis. Datum Iaurini, feria tercia proxima ante festum Purificacionis Virginis gloriose, anno Domini Mmo CCCCmo vigesimo sexto.||
Nos enim amicabilibus peticionibus vestris annuentes una cum prescripto Emerico de Pech homine regio nostrum hominem, videlicet fratrem Gregorium, unum ex nobis ad premissa peragenda nostro pro testimonio duximus destinandum, qui tandem ad nos reversi nobis concorditer retulerunt, quod prefatus homo regius presente dicto nostro testimonio, feria sexta proxima ante predictum festum Purificacionis Marie Virginis gloriose prefatum Blasium Baroth iobagionesque suos in aliis litteris nostris contentos eidem statuere committendo in facie porcionis sue possessionarie in possessione Pech vocata habite in vestre citasset amicicie in presenciam. Datum tercio die diei citacionis premisse, anno Domini supradicto.||
Külzetén: Pro religioso viro domino fratre Michaele, abbati de Beel contra Blasium Baroth et iobagiones eiusdem ad sabbatum proximum post festum Beati Blasii proxime venturum. Vicesecundarie citatorie relacio.