Serenissimo principi domino Sigismundo, Dei gracia Romanorum regi semper augusto ac Hungarie, Bohemie, Dalmacie, Croacie etc. regi domino ipsorum metuendo conventus monasterii Sancti Martini Sacri Montis Pannonie oraciones in Domino. Vestra noverit serenitas, quod cum nos omni cum obediencia, qua decuit, receptis litteris vestris annualibus pro religiosis viris dominis fratribus Michaele abbate et conventu monasterii Sancti Maurici de Bel ad inquisiciones, citaciones, evocaciones, prohibiciones ac aliarum litterarum vestre et reginalis maiestatum exibiciones, necnon ad alia omnia, que iuxta regni vestri consuetudinem talibus in processibus fieri consueverunt, faciendis per [anni circulum] generaliter datis et graciose concessis nobisque preceptorie directis, iuxta earundem continenciam una cum Dominico de Gych homine vestre serenitatis inter alios homines vestros in eisdem litteris vestris annualibus conscriptos nominaliter inserto nostrum hominem, videlicet Laurencium, chori ecclesie nostre clericum pro testimonio transmissemus fidedignum, qui tandem exinde regressi nobis uniformiter retulerunt, quod cum ipsi feria secunda, videlicet in festo Beatorum Fabiani et Sebastiani martirum proxime preteritum in comitatu Wesprimiensi simul procedendo ab omnibus, quibus decuisset et licuisset, nobilibus videlicet et ignobilibus ac ab aliis cuiusvis status et condicionis dicti comitatus Wesprimiensis comprovincialibus hominibus palam et oculte diligenter inquirendo talem de infrascriptis rescivissent veritatem, quod Dominicus et Sebastianus de Beeb officiales possessionum pertinencium ad castrum Ugud appellatum per magnificum virum dominum Iohannem de Gara constituti, una cum Paulo filio Mathye de Kysbedege, Thoma dicto Zeregel et Bartholomeo de dicta Beeb ac ceteris ipsorum familiaribus et complicibus eis associatis pridem, videlicet in festo Beati Augustini episcopi et confessoris proxime preterito quendam currum, unum doleum et quosdam saccos Anthonii filii Andree de Kapulch familiaris dicti abbatis et conventus, necnon tres equos in dicto curru existentes, tunicam unam et biccellum unum, necnon alia bona Luce villici Anthonii filii Thome et Nicolai de Borsod iobagionum eorundem abbatis et conventus erga ipsos reperta in prefata possessione Ugud repertorum abstulissent et, quo eorum voluntati placuisset, fecissent; insuper idem Dominicus et Sebastianus una cum predictis familiaribus et complicibus ipsorum feria sexta proxima post festum Decollacionis Beati Iohannis Baptiste similiter de novo elapsum quendam iobagionem ipsorum abbatis et conventus, Dominicum dictum Dekan de Kayar in possessione capituli Wesprimiensis NogGymolth vocata in expedicione certarum suarum negociacionum existentem reperiendo verbis illicitis et vituperiosis pertractando et diris vulnerum plagis afficiendo captivassent resque et bona apud eum repertas et inventa auferendo in certis pecuniarum sumpmis pactavissent; eo non contenti idem Dominicus et Sebastianus cum familiaribus ipsorum predictis et complicibus ad porcionem possessionariam eiusdem abbatis et conventus in possessione Noztop vocata habitam armatis manibus et potenciariis irruendo ibique Valentinum, Nicolaum, Paulum et Emericum iobagiones condicionales eorum verbis illicitis et vituperiosis dehonestando universos boves pecudesque et pecora de curiis et stabulis eorum abigendo auferentes depulissent, quos et que tandem sub tanto pacto solucionis pecuniarum restituissent; ultra premissa antedicti Dominicus et Sebastianus cum aliis prenominatis, feria quarta proxima post festum Beati Anthonii abbatis novissime elapsum sepedicti Dominicus et Sebastianus cum prenominatis eorum familiaribus et complicibus quosdam duos iobagiones dictorum abbatis et conventus puta Ladislaum et Thomam de Kayar in silva usuali inter metas possessionis Barnald appellate ipsorum abbatis et conventus ligna succidentes reperissent, captivassent captosque una cum curribus et bobus ipsorum iuga trahentibus ad possessionem magnificorum virorum, dominorum Nicolai de Gara palatini et Iohannis fratris sui Tezzer portando et, quousque eorum placuisset voluntati, captos conservando modo simili in certis sumpmis pecuniarum pactatos discedere permisissent eorum potencia mediante in preiudicium, dampnum dictorum abbatis et sui conventus ac monasterii ipsorum detrimentum et derogamen valde ingens. Datum quinto die diei inquisicionis antedicte, anno Domini Mo CCCCmo vigesimo septimo.||
[Hátán:] Contra Nicolaus Garay