Serenissimo principi domino Sigismundo, Dei gracia Romanorum regi semper augusto ac Hungarie, Bohemie, Dalmacie, Croacie etc. regi, domino ipsorum metuendo conventus monasterii Sancti Martini Sacri Montis Panonie oraciones in Domino debitas ac devotas. Vestra noverit serenitas litteris vestris annualibus ad inquisiciones, ewocaciones, prohibiciones et ad omnia alia, que talibus in processibus iuxta regni vestri consuetudinem de iure fieri consueverunt facienda pro religiosis viris dominis fratri Michaeli abbati et conventu monasterii de Beel per anni circulum generaliter datis et graciose concessis nobis loquentibus suprema cum obediencia receptis, iuxta earundem continenciam una cum Blasio de Gych, homine vestro in eisdem litteris vestris annualibus nominaliter expresso nostrum hominem, videlicet religiosum virum Gregorium sacerdotem, unum ex nobis ad infrascripta peragenda pro nostro testimonio fidedignum duximus destinandum, qui tandem iidem exinde ad nos reversi nobis concorditer retullerunt, quod prefatus homo vester presente dicto nostro testimonio, feria sexta proxima post festum Beate Margarete virginis et martiris de novo elapsum in comitatu Vesprimiensi procedendo ab omnibus, quibus decuisset et licuisset, nobilibus videlicet et ignobilibus ac alterius cuiusvis status et condicionis dicti comitatus hominibus diligenter inquirendo talem de infrascriptis scire potuisset veritatem, quomodo Paulus filius Francisci de Segwar, Ladislaus, Thomas et Georgius filii Iohannis de Chekwth, Briccius et Sybes de Koronthal, Blasius de Ethy et Georgius filius eiusdem officiales de Bagdan quadam sinistra occasione assumpta preceptu cuiusdem Fabiani dicti Sere de Lerenthe per quatuor circiter annos proxime elapsos iobagiones dictorum domini Michaelis abbatis et conventus dicti monasterii de Beel in possessionibus eorundem Bursud, Polyan, Ganna et Noztoph commorantes ad provinciam Zaladiensem et districtum circa lacum Balatini seu alios adnegociaciones et mercimonia ipsorum exercere volentes proficiscendo, in eundo et redeundo multipharie equis, bobus, curribus ac aliis eorum bonis et rebus spoliando ac calompniose ipsos arestando et arestari faciendo ac verberum et vulnerum autem postremo minas mortis eisdem imponendo per strata et vias liberas et communes ipsos dicta eorum negocia et mercimonia exercere ire et peragrare libere non permisissent, in quibus prealegatis domino abbati et suo conventui ac per consequens dictis ipsorum iobagionibus plus, quam trecentorum florenorum aureorum iusti ponderis dampna intullissent minus debite et iniuste ac eciam inferre non cessarent de presenti; insuper anno in presenti, in festo scilicet Nativitatis Beati Iohannis Baptiste proxime preterito Andreas filius Nicolai litterati, Georgius, Gregorius filii Mauricii, Michael dictus Mod, Thomas filius Iohannis et Iohannes filius eiusdem in predicta possessione Bagdan vocata commorantes ex induccione voluntate et annuencia predictorum Pauli filii Francisci, Ladislai, Thome, Georgii, Briccii Sykes, Blasii, Georgii preconcepta rancoris malicia manibus armatis et potenciariis ad possessionem dictorum domini abbatis et conventus Polyan vocatam veniendo ibidemque Demetrium Sartorem, iobagionem et familiarem eorundem omni sua sine culpa miserabili nece interemissent; hiis non contenti predicti Paulus, Ladislaus, Thomas, Georgius ex induccione et persuasione antedictorum Briccii et Sykes de dicta Koronthal, feria quarta proxima post dictum festum Nativitatis Iohannis Baptiste dum Bartholomeus et Anthonius officiales ac Thomas villicus de Borsud dicti domini Michaelis abbatis et conventus super premissis malis illatis pro facienda inquisicione ad possessionem Vasarhel, sedem videlicet iudiciariam accessissent ac demum per possessionem Bagdan antedictam versus possessionem in libera via vis proficissendo reverti voluissent missis et destinatis Blasio de Echy, Georgio filio eiusdem, Fabyano dicto Zewre, Martino filio Iohannis, Dominico Sutore, Iohanne filio Nicolai, Laurencio dicto Kazdagh, Petro filio Andree, Benedicto filio Gregorii Fabri, Andrea villico, Damiano filio eiusdem, Matheo filio Benedicti, Georgio dicto Dobay, Iacobo Carnifice, Andrea filio Georgii, Anthonio filio Blasii, Iohanne filio Petri, Stephano, Thoma, Nicolao, Petro, Bechy, Iohanne filio Georgii similiter Fabro dicto Subis, Dominico Pinther, Nicolao Bako, Petro similiter Bako, Francisco filio eiusdem Petro, Thoma dicto Lewkes, Georgio, Michaele filio Laurencii, Nicolao Fabro, Emerico dicto Kazdagh, Emerico filio eiusdem, Iohanne filio Mathie, Stephano villico, Iohanne filio Francisci, Petro fratre eiusdem, Gregorio, Andrea filiis Nicolai, Valentino filio Nicolai, Vincencio filio Mauricii iobagionibus ipsorum in dicta possessione Bagdan vocata commorantibus cum armatis manibus et potenciariis insidias eisdem officialibus et villicis dictorum domini abbatis et conventus ponendo ac equis eorundem prius spoliatis et ablatis more predonico et abductis eosdem morti tradere voluissent pluribus ictibus sagitarum, biccellorum, securium contra eos fulmiando iactatis et transmissis nisi auxiliante glorioso Deo evadere potuissent, potencia eorum mediante in preiudicium prealegatorum domini Michaelis, abbatis de Beel et conventus sui ac dampnum et derogamen multum grande. Datum septimo die diei inquisicionis prenotate, anno Domini millesimo quadringentesimo vigesimo septimo.