Serenissimo principi domino Sigismundo, Dei gracia Romanorum regi semper augusto ac Hungarie, Dalmacie, Croacie, Bohemie etc. regi, domino ipsorum gracioso conventus monasterii Sancti Martini Sacri Montis Panonie oraciones in Domino debitas ac devotas cum perpetua fidelitate. Litteris vestris annualibus pro religioso viro domino fratre Mychaele abbate et conventu monasterii Beati Mauricii de Beel ad inquisiciones, evocaciones, prohibiciones metarum, reambulaciones et renovaciones ac ad omnia alia, que talibus in processibus iuxta regni vestri consuetudinem fieri consueverunt facienda eisdem graciose datis et concessis nobisque preceptorie directis et iuxta earundem continenciam una cum Emerico de Felpech, homine vestro inter alios homines vestros in dictis litteris vestris annualibus conscriptos nominatim expresso nostrum hominem, videlicet religiosum virum, fratrem Iohannem sacerdotem, unum ex nobis ad infrascriptam inquisicionem faciendam nostro pro testimonio transmisimus fidedignum, qui tandem exinde ad nos reversi nobis uniformiter retulerunt, quomodo ipsi in festo Cathedre Beati Petri apostoli proxime preterito in comitatu Iauriensi simul procedendo a nobilibus et ignobilibus ac cuiusvis status conprovincialibus dicti comitatus Iauriensis hominibus, quibus decens et opportunum fuisset, palam et oculte diligenterque inquirendo talem de infrascriptis scire potuissent veritatem, quomodo Iacobus filius Martini, Thomas filius Iohannis, Ladislaus dictus Buday, Paulus dictus Baraniay, Petrus dictus Myke, Blasius Parvus, Iohannes filius Laurencii, Gregorius Fekethe in Tharyan commorantes, necnon Andreas de Tarkan anno proxime preterito, videlicet die dominico proximo ante festum Beati Mychaelis archangeli proxime preteritum manibus armatis et potenciariis ad domum Mychaelis filii Luce, iobagionis dictorum domini Mychaelis abbatis et conventus de Bel irruendo ac hostiliter insurgendo Valentinum filium dicti Mychaelis, Clementem de Terek, Dominicum de Gych familiares et decimatores dictorum abbatis et conventus multis vituperacionibus fulminassent ac diris verberum et vulnerum plagis ictibusque sagittarum enormiter sauciassent; hiis non contenti dicti Petrus Myke ac Thomas, necnon Stephanus dictus Santha de dicta Tharyan una cum Anthonio de Pycord, circa Carnisprivium, scilicet proxime elapsum unum bonum pecus seu vaccam sterilem pinguem relicte Emerici iobagionis dictorum domini abbatis et conventus [...] in virgultis reperiendo mactassent et in usus ipsorum proprios convertissent potencia mediante in preiudicium et dampnum dictorum domini abbatis et conventus ac derogamen multum grande. Datum sexto die diei inquisicionis antedicte, anno Domini Mo CCCCmo XXmo octavo.