Serenissimo principi domino Sigismundo, Dei gratia Romanorum regi semper augusto ac Hungarie, Dalmatie, Croatie regi domino ipsorum gratioso, capitulum ecclesie Iauriensis orationes in Domino debitas et devotas cum perpetua fidelitate. Litteris vestris annualibus ad inquisitiones, evocationes, prohibitiones, metarum erectiones et renovationes, necnon ad omnia alia, que talibus in processibus iuxta regni vestri consuetudinem de iure fieri consueverunt, facienda pro religiosis viris fratre Mychaele, abbate de Beel et conventu loci eiusdem emanatis ac eisdem per vestram serenitatem gratiose datis et concessis, nobis preceptorie directis ac per nos summa cum obedientia receptis et iuxta earumdam continentiam una cum Mathya dicto Sada de Nema homine vestro in dictis litteris vestris annualibus inter alios homines vestris nominaliter inserto nostrum hominem, videlicet Ladizlaum, chori dicte ecclesie nostre clericum, ad infrascriptam inquisitionem faciendam nostro pro testimonio transmisissemus fide dignum, qui tandem exinde ad nos regressi nobis concorditer retulerunt, quod, cum ipsi feria sexta proxima post festum Beati Iacobi apostoli proxime preterita [1428. júl. 30.] in comitatu Iauriensi simul procedendo a nobilibus et ignobilibus ac alterius cuiusvis status et condicionis conprovincialibus dicti comitatus Iauriensis hominibus, a quibus decens et opportunum fuisset, palam et occulter diligetiterque inquirendo talem de infrascriptis scire potuissent veritatem, quomodo Simon, filius condam Iohannis bani, de Marochyda quandam possessionem ipsorum Arpas vocatam dicti domini abbatis et conventus in dicto comitatu Iauriensi existentem, quam alias antecessores abbates prefati domini Mychaelis abbatis preallegato Iohanni filio bani in feudum et arendam pro quadam certa quantitate pecuniarum mediantibus litteris domini Nicolai de Gara, regni Hungarie palatini, tradidissent, super quibus arendatione et in feudum conservatione a multis retroactis annis et temporibus dictus Simon et pater eius predictus domino abbati et conventui nullam inpendissent satisfactionem, sed eandem possessionem Arpas vocatam, necnon pontem et portum simul cum tributo inter metas eiusdem possessionis Arpas et molendinum in fluvio Raba vocato decurrens habitum et exigi solitum minus iuste et indebite pro se ipsis occupassent et nonnullos homines ac mediam plateam populosam in facie eiusdem possessionis effecissent, ad dictam Marochyda applicando, modo simili Marochyda nominari fecissent contra sepissimas prohibitiones dictorum domini abbatis et conventus et adhuc etiam de presenti uterentur potentia mediante in preiudicium, dampnum ac derogamen valde magnum. Datum sexto die diei inquisitionis antedicte, anno Domini millesimo quadringentesimo vigesimo octavo. [1428. aug. 4.]