Serenissimo principi domino Sigismundo, Dei gratia Romanorum regi semper augusto ac Hungarie, Bohemie, Dalmatie, Croatie etc. regi, domino ipsorum metuendo conventus monasterii Sancti Martini Sacri Montis Pannonie orationes in Domino. [Vestra] noverit serenitas nos litteras vestras sumpma cum obedientia recepisse in hec verba:||
Sigismundus ... etc. fidelibus suis conventui Sancti Martini Sacri Montis Pannonie salutem et gratiam. Dicitur nobis in personis religiosi viri fratris Anthonii, prepositi et conventus ecclesie de Chorna, qu[omodo] religiosus vir dominus frater Michael abbas et conventus monasterii de Beel missis et destinatis Francisco et B[art]holomeo de Terdemich nobilibus familiaribus et officialibus ipsorum in possessione Kayar vocata constitutis, necnon Georgio fa[bro], Valentino Polgar, altero Valentino, filio Briccii, Alberto, filio Georgii, dicti Feketh, Iohanne litterato, Andrea, filio Andree, G[y]ke, Valentino, filio Georgii sartoris, Anthonio iudice, Laurentio, filio Petri, Georgio, filio Laurentii, Briccio, filio Iohannis, M[o]ruch, Petrus (!) Kos, Iohanne Nemeth, Iohannes filio Mauri, Laurentio dicto Roman, Thoma sartore, Georgio Magno, Georgio Feketh, Iohanne Feketew, Michaele dicto Papay, Iacobo dicto Polgar, Stephano Pinther, Anthonio, filio Bartholomei et Laurentio Lanchws, necnon aliis populis et iobagionibus eorumdem in dicta possessione Kayar residentibus, circa festum Beate Marie Magdalene proxime preteritum [1428. júl. 22.] fruges et segethes milii (!) iobagionum prope fatorum prepositi et conventus de Chorna in possessione Gyarmath conmorantium aufferri et asportari et residuam partem ipsorum frugum et milii, quam deportari non valuissent, curribus et pedibus equorum conculcari et ibidem anichilari fecissent potentia mediante; que sic facta fore cum certis litteris inquisitionalibus exinde confectis possent comprobari. Super quo fidelitati vestre firmiter precipiendo mandamus, quatenus vestrum mittatis hominem pro testimonio fide dignum, quo presente Sebastianus vel Georgius, aut Gregorius de Kormozo (!), seu Emericus dictus Therebes de Felpech, seu Andreas de eadem, sive Lucas de Gych, neve Petrus de Musui, aliis absentibus homo noster evocet prefatum Michaelem abbatem et alios predictos contra annotatos exponentes nostram in presentiam ad terminum competentem rationem premissorum reddituros, prefatos quoque iobagiones eisdem statuere conmittendo, litis pendentia inter ipsos, si qua foret, non obstante. Et post hec ipsius evocationis seriem cum nominibus evocatorum et statuere conmissorum, terminoque assignato nobis fideliter rescribatis. Datum Bude, feria tertia proxima post dominicam Iudica, anno Domini millesimo quadringentesimo vigesimo nono. [1429. márc. 15.]||
Nos itaque mandatis vestre serenitatis in omnibus obedire cupientes, ut tenemur, una cum prefato Emerico Therebes de Felpech nostrum hominem, videlicet religiosum virum fratrem Iohannem unum ex nobis, ad premissam evocationem faciendam pro testimonio trasmisimus fide dignum. Qui tandem exinde ad nos reversi nobis uniformiter retulerunt, quomodo ipsi feria quinta proxima ante festum Beati Ambrosii episcopi et confessoris proxime preterita [1429. márc. 31.] dictum dominum Michaelem abbatem in possessione sua Kayar vocata, necnon Franciscum, Bartholomeum in eadem Kayar, officiolatu vicelicet ipsorum contra antefatum Anthonium prepositum de Chorna et conventum loci eiusdem ad octavas festi Beati Georgii martiris proxime nunc affuturas [1429. máj. 1.] vestre serenitatis evocassent in presentiam rationem premissorum reddituros litis pendentia, si qua foret inter ipsos, non obstante, predictos iobagiones eorum eisdem statuere conmittendo. Datum quinto die evocationis antedicte, anno Domini predicto. [1429. ápr. 4.]