Serenissimo principi domino Sigismundo, Dei gracia Romanorum regi semper augusto ac Hungarie, Bohemie, Dalmacie, Croacie etc. regi, domino ipsorum metuendo conventus monasterii Sancti Martini Sacri Montis Pannonie oraciones in Domino debitas et devotas. Vestra noverit serenitas, quod nos litteras vestras mediocre sigillo vestro consignatas nobisque preceptorie transmissas sumpma cum obediencia recepisse in hec verba:||
Sigismundus, Dei gracia Romanorum rex semper augustus ac Hungarie, Bohemie, Dalmacie, Croacie etc. rex fidelibus suis conventui Sancti Martini Sacri Montis Panonie salutem et graciam. Dicitur nobis in personis religiosorum virorum, domini fratris Michaelis, abbatis de Beel et conventus loci eiusdem, quomodo Fabianus iudex de Garmath, Nicolaus filius Blasii de Nagbarathy, Gregorius filius Blasii dictus Zan, Thomas filius Michaelis, Benedictus Ruffus, Stephanus filius Thome Magni, Thomas Bank dictus, Stephanus filius Michaelis, Petrus filius Dominici, Dyonisius Carnifex, Symon dictus de Morochyda, Briccius Parvus, Laurencius Conka, Nicolaus filius Georgii, Iacobus filius Laurencii, Dominicus Fizes dictus, Barnabas filius Emerici, Georgius Beke dictus, Anthonius filius Dominici, Emericus filius Laurencii, Thomas, Iwan, Laurencius vilicus, Petrus filius Laurencii, Iohannes filius Benedicti, Briccius Thakach, Iacobus filius Clementis, Iacobus Serechen dictus, Paulus Dekan, Stephanus Kywmies, Barthus, Petrus, Iohannes, Benedictus, Thomas filii eiusdem Barthus, Ladislaus filius Andree, Ladislaus Ban dictus, Benedictus Chonka dictus, Mathias Vari, Maik, Laurencius de Ihas, Thomas dictus Konya, Valentinus Pechy dictus, Petrus Zany dictus, Iohannes filius Petri, Thomas Syke dictus, Georgius Kerek, Benedictus et Paulus Varga de Garmath officiales et iobagiones religiosi viri, domini fratris Anthonii, prepositi de Chorna et conventus loci eiusdem ex commissione et mandato ipsorum domini Anthonii prepositi et conventus domini ipsorum ac eciam ex consensu, voluntate et instigacione Ladislai litterati de Pastor quasdam terras arabiles intra metas possessionis prefatorum domini abbatis et conventus Pangud vocate pro capeciis consuetis perarari et seminari ac eciam quamplura fenilia seu prata falcari fecissent et infra octo annorum spacia retrolapsa absque solucione capeciarum seu proventus prati et fenili pro usu prefatorum domini abbatis et conventus provenire debentis contra sepissimas prohibiciones ipsorum domini abbatis et conventus deportari fecissent et quod idem dominus Anthonius prepositus personaliter et sui officiales eidem domino abbati et officiali eiusdem quampluries de prefattis capeciis et proventus prati omnimodam satisfaccionem impendere asumpsissent, quod idem dominus Anthonius prepositus ad plurimas peticiones ipsius domini abbatis et sui officialis minime facere curassent, ymmo quod deterius est, prefati iobagiones de Garmath ipsas terras arabiles absque solucione capeciarum ac fenilya et prata contra sepissimas prohibiciones uterentur de presenti, preterea prefati iobagiones de Garmath quendam iobagionem prefatorum domini abbatis et conventus, videlicet Symonem filium Iohannis de Kayar in possessione Garmath reperiendo ex mandato et commissione prefati domini prepositi et conventus de curia ipsius Symonis unum equm suum decem et quatuor florenos novos vallentem minus iuste et indebite excepissent et, quo ipsorum placuisset voluntati, fecissent potencia ipsorum mediante in preiudicium ipsorum valde magnum. Super quo fidelitati vestre firmiter precipiendo mandamus, quatenus vestrum mittatis hominem pro testimonio fidedignum, quo presente Clemens filius Nicolai sin Matheus seu Michael filius eiusdem sive Mathias neve Michael vel Blasius de Nema aut Emericus Therebes de Pech et Iohannes filius Symonis de eadem aliis absentibus homo noster ab omnibus, quibus incumbit meram de premissis experiatur veritatem scitaque premissorum mera veritate evocet prefatos dominum Anthonium prepositum et Ladislaum litteratum contra annotatos abbatem et conventum de Beel nostram in presenciam ad terminum competentem racionem de premissis reddituros, predictos iobagiones et familiares ipsius domini prepositi eidem statuere committendo litis pendentia, si qua foret inter ipsos, non obstante et post hec ipsius inquisicionis et evocacionis cum nominibus evocatorum terminoque asignato nobis fideliter rescribatis. Datum Bude, feria tercia proxima post festum Beati Benedicti abbatis, anno Domini millesimo quadringentesimo vigesimo nono.||
Nos itaque mandatis ipsius vestre serenitatis semper obedire cupientes, ut tenemur, una cum prefato Michaele de Nema homine vestre serenitatis nostrum hominem, videlicet religiosum virum, dominum fratrem Iohannem, unum ex nobis ad prescripta peragenda nostro pro testimonio transmisimus fidedignum, qui demum iidem exinde ad nos reversi nobis concorditer retulerunt, ut ipsi in festo Beatorum Thyburcii et Valleriani martirum proxime preterito in comitatu Iauriensi simul procedendo a nobilibus et ignobilibus ac alterius cuiusvis status et condicionis et conprovincialibus dicti comitatus hominibus, a quibus decens et opportunum fuisset, palam et oculte diligenter inquirendo omnia premissa et quevis premissorum singula sic esse, fuisse et facta fore scivisset, sicut eidem vestre dictum extitisset maiestati et quemadmodum tenor litterarum vestrarum per omnia continet prescriptarum, die in prelibato prefatos dominum Anthonium prepositum in facie possessionis Garmath et Ladislaum litteratum in facie possessionis Pastor contra annotatum dominum Michaelem, abbatem de Beel ad octavas festi Beati Georgii martiris proxime affuturas in vestre serenitatis evocasset in presenciam predictosque familiares et iobagiones ipsius domini prepositi de Garmath eidem statuere committendo litis pendencia, si qua foret inter ipsos, non obstante. Datum quinto die diei inquisicionis, evocacionis et statuere commissionis termini prenotati, anno Domini supradicto.||
[Külzetén:] Domino regi. Pro religioso viro domino fratre Michaele abbate de Beel contra religiosum virum dominum fratrem Anthonium prepositum de Chorna et Ladislaum litteratum de Pastor inquisitorie ad octavas festi Beati Georgii martyris evocatorie.