Nos conventus monasterii Beati Michaelis archangeli de Chorna memorie commendamus, quod religiosus vir, dominus frater Adrianus, custos ecclesie Sancti Martini Sacri Montis Pannonie cum procuratoriis literis dicti conventus ad nostram personaliter veniendo presenciam, in persona religiosi viri domini fratris Nicolai abbatis dicti monasterii Sancti Martini Sacri Montis Pannonie et tocius conventus per modum protestacionis et prohibicionis nobis significare curavit in hunc modum, quod prout ipsi percepissent, Ieronimus dominus Kolos de Nema quasdam statuciones et reambulaciones et metarum consignaciones possesionis Gwnyw ac fluvii Danubii, nec non insularum et Tonya, aquarumque piscatoriarum et terrarum arabilium ipsorum domini abbatis et conventus, ipsos omnis iuris titulo concernencium, in comitatibus Iauriensi et Komaromiensi adiacentibus et existentibus habitarum, quosdam eciam nobiles in dictis comitatibus vicinos et commetaneos earundem, quorum nomina ignorassent de presenti, fateri et super eisdem literas pro sui parte emanari facere procurasset, quibus mediantibus prefatus Ieronimus dictam possessionem Gwnyw simul cum prefato Danubio et aliis utilitatibus superius narratis ad dictam Gwnyw pertinentibus a prefatis domino abbate et suo conventu alienare et devastare niteretur in preiudicium et dampnum ipsorum valde magrum. Unde facta huiusmodi protestacione prefatum Ieronimum dominum Kolos de Nema et suos successores universos, aliosque quoslibet a reambulacione et metarum consignacione et sibi ipsi statuifaccione et se in dominium eorum intromissione fructuumque percepcione, vicinos siquidem nobiles ab indebita fassione factis vet fiendis prohibuit inhibendo et inhibuit contradicendo coram nobis testimonio presencium mediante. Datum octava die festi Beati Georgii martyris, anno Domini MCCCCXXIX. [1429. máj. 1.]