Serenissimo principi domino Sigismundo, Dei gracia Romanorum imperatori semper augusto ac Hungarie, Bohemie, Dalmacie, Croacie etc. regi, domino ipsorum metuendo conventus ecclesie Sancti Martini Sacri Montis Panonie oraciones in Domino debitas ac devotas. Vestra noverit serenitas, quod cum nos receptis litteris vestris annualibus sigillo vestro consignatis pro religioso viro, domino fratre Michaele, abbate ecclesie de Beel conventuque loci eiusdem ad inquisiciones, evocaciones et prohibiciones, necnon ad omnia alia, que talibus in processibus iuxta regni vestri consuetudinem de iure fieri consueverunt facienda per anni circulum generaliter datis et graciose concessis nobisque preceptorie transmissis, iuxta earundem continenciam una cum Bartholomeo de Gych, homine vestro inter alios homines vestros litteris vestris in eisdem conscriptos nominaliter expresso nostrum hominem, videlicet fratrem Damianum sacerdotem, unum ex nobis ad infrascriptam inquisicionem faciendam nostro pro testimonio fidedignum duxissemus destinandum, qui tandem exinde ad nos reversi nobis concorditer retullerunt, ut idem homo vester presente iam fato nostro testimonio, feria secunda proxima ante festum Beati Laurencii martiris proxime preteritum in comitatu Wesprimiensi procedendo ab omnibus, quibus decuisset et licuisset, nobilibus videlicet et ignobilibus ac alterius status et condicionis dicti comitatus hominibus palam et oculte diligenter de subscriptis talem scivisset veritatem, quod Stephanus Sclavus, Petrus similiter Sclavus, Symon et Anthonius familiares et iobagiones nobilis domine relicte ac magistri Thome canonici ecclesie Wesprimiensis, necnon Base et Ladislai filiorum condam Benedicti de Debrenthe in eadem commorantes ex commissione et mandato ipsorum domine relicte et magistri Thome, Base et Ladislai feria quinta proxima ante festum ad Vincula Beati Petri apostoli proxime preteritum manibus armatis et potenciariis ad possessionem ipsorum domini abbatis et conventus Ganna irruendo quendam iobagionem eorum abbatis et conventus nomine Paulum dictum Benche in eadem possessione Ganna commorantem et dominam consortem eiusdem Pauli verbis illicitis et vituperiosis dehonestando diris verberum et vulnerum plagis affecissent; eo non contentus prefatus Base personaliter una cum Georgio de Vsal, altero Georgio de Choltha, Stephano Zerchek, Lorando de Kysfalud, Bartholomeo castellano de Zolnok, Nicolao de Colta, Dominico de Thanka, Georgio Sumpoch, Nicolao de Hollos familiaribus, item Petro Sclavo, Symone, Anthonio, Georgio Sartore, Stephano Sclavo, Blasio, Benedicto Suba, Petro filio Thome, Anthonio filio Mathie Nicolao, Iohanne Fekethew, Laurencio, Stephano filiis eiusdem in Debrenthe, Dominico Carpentario et Colomano in Iako possessionibus commorantibus, iobagionibus scilicet suis et dictorum domine matris et fratrum suorum similiter ex consensu, voluntate et instigacione ipsorum, feria sexta proxima ante festum predictum ad Vincula Beati Petri apostoli malicia preconcepta similiter manibus armatis et potenciariis ad possessionem predictam Ganna vocatam tempore nocturnali fractis hostiis domorum iobagionum in eodem residencium universosque viros, mulieres et puellas de domibus et lectis ipsorum nudos extraxissent et verbis illicitis et vituperiosis dehonestassent, dire et acriter vulnerassent, quosdam denarios quatuor possessionum, videlicet Polyan, Noslop, Borsud et eiusdem Ganna et in scrinio Mathie villici depositos, quos idem dominus abbas de Beel exactoribus quinquagesime et sex denarios mandato vestro dare et aministrare debuisset; similiter fracto scrinio ipsius Mathie villici excepissent ipsumque Matheum villicum et Paulum, Marcum, Andream et alterum Matheum, Thomam Sclavum et Demetrium filium Stephani in eadem possessione Ganna commorantes captivassent, captivandoque et ligatis eorum manibus universisque rebus et bonis in domibus ipsorum repertos, necnon equos, boves, vaccas ac aliis animalibus omni eorum sine culpa ablatis ad castrum ipsorum Debrenthe assportando et abductis ipsos iobagiones in ipsorum vinculis conservassent et conservarent eciam de presenti, easdem res et bona eorundem iobagionum ipsorum domini abbatis et conventus, quo ipsorum placuisset voluntati fecissent potencia ipsorum mediante in preiudicium ipsorum domini abbatis et conventus valde magnum. Datum quinto die diei inquisicionis antedicte, anno Domini millesimo quadringentesimo tricesimo quarto.