Serenissimo principi domino Sigismundo, Dei gracia Romanorum imperatori semper augusto ac Hungarie, Dalmacie, Bohemie, Croacie etc. regi, domino ipsorum metuendo conventus ecclesie Sancti Martini Sacri Montis Panonie oraciones in Domino debitas ac devotas. Vestra noverit serenitas, quod cum nos receptis litteris vestris annualibus sigillo vestro consignatis pro religioso viro domino fratre Michaele abbate ecclesie de Beel conventuique loci eiusdem ad inquisiciones, evocaciones et prohibiciones, necnon ad omnia alia, que talibus in processibus iuxta regni vestri consuetudinem de iure fieri consueverunt facienda per anni circulum generaliter datis et graciose concessis nobisque preceptorie transmissis, iuxta earundem continenciam una cum Georgio de Gych, homine vestro inter alios homines vestros litteris vestris in eisdem conscriptos nominaliter expresso nostrum hominem, videlicet fratrem Nicolaum sacerdotem, unum ex nobis ad infrascriptam inquisicionem faciendam nostro pro testimonio fidedignum duxissemus destinandum, qui tandem exinde ad nos reversi nobis concorditer retullerunt, ut idem homo vester presente iam fato nostro testimonio, feria sexta proxima post festum Beati Martini confessoris proxime preteritum in comitatu Vesprimiensi procedendo ab omnibus, quibus decuisset et licuisset, nobilibus videlicet et ignobilibus et alterius status et condicionis dicti comitatus hominibus palam et oculte diligenter de subscriptis talem scivisset veritatem, quod Georgius de Vsaal, Stephanus de Zercheek, Georgius, Nicolaus de Koltha, Lorandus de Kysfalud, Bartholomeus castellanus Debrenthe, Dominicus dictus Thanko, Nicolaus de Hollos, Georgius de Sumipach, Demetrius, Iohannes filii Georgii de Noslwp familiares, Petres Sclaus, Symon, Anthonius, Stephanus Sclaus, Blasius, Gregorius Sartor, Benedictus Suba, Emericus, Nicolaus, Zekeres, Demetrius Sclaus, Gregorius Parvus, Petrus filius Thome, Anthonius filius Mathye, Nicolaus, Iohannes Fekethel, Laurencius, Stephanus filii eiusdem Dominicus Carpentarius, Marcus, Benedictus Chygan, Matheus, Damianus Estergar, Gregorius filius eiusdem, Iohannes, Petrus Carpentarius, Colmanus in possessionibus Debrenthe et Iako commorantes, iobagiones nobilis domine relicte ac magistri Thome Basee, Ladislai, Emerici, Iohannis filiorum condam Benedicti Debrenthe ex commissione et mandato ipsorum domine relicte ac magistri Thome, Base, Ladislai, Emerici, Iohannis, feria tercia proxima post festum Undecim Milia Virginum proxime preteritum manibus armatis et potenciariis ad possessionem ipsorum domini abbatis et conventus Ganna appellatam irruendo quendam iobagionem Paulum dictum Benche non ei licenciam dando, nec terragio recipiendo ac debitis suis non persolvendo, sed super currus ipsorum potencialiter ad possessionem Debrenthe deportassent; eo non contenti similiter feria tercia post festum Omnium Sanctorum proxime preteritum ex voluntate prefati domine ac filiorum suorum prefati familiares et iobagiones de dicta Debrenthe et Iako similiter ad possessionem Ganna irruendo quendam iobagionem prefati abbatis et conventus Matheum nomine non ei licenciam dando, nec terragio recepto et non debitis suis persolutis super currus ipsorum ad Debrenthe deduxissent moraturum, imo, quod deterius est, in die Sancti Emerici confessoris prefati familiares et iobagiones similiter ex voluntate predicte domine ac magistri Thome, Basee, Ladislai, Emerici, Iohannis filiorum eiusdem ad faciem possessionis predicte Ganna irruendo ibique unum bonum bovem Anthonii vilici deportando ad castrum Debrenthe deduxissent et permactassent potencia ipsorum mediante in preiudicium ipsorum domini abbatis et conventus valde magnum. Datum in Vasarheel, quinto die diei inquisicionis antedicte, anno Domini millesimo quadringentesimo XXXmo quarto.