Serenissimo principi domino Sigismundo, Dei gracia Romanorum imperatori semper augusto ac Hungarie, Bohemie, Dalmacie, Croacie etc. regi, domino ipsorum gracioso conventus monasterii Sancti Martini Sacri Montis Panonie oraciones in Domino debitas ac devotas cum perpetua fidelitate. Litteris vestris annualibus ad inquisiciones, evocaciones, prohibiciones et ad omnia alia, que talibus in processibus iuxta regni consuetudinem de iure fieri consueverunt facienda pro religioso viro, domino fratre Michaele, abbate et conventu monasterii Beati Maurici martiris de Beel per anni circulum graciose datis et concessis nobis loquentibus suprema cum obediencia receptis, iuxta quarum continenciam una cum Benedicto de Chatar, homine vestro in prefatis litteris vestris annualibus inter alios homines vestros conscriptos expresse nominato nostrum hominem, videlicet fratrem Iohannem sacerdotem, unum ex nobis fratribus conventualibus ad infrascriptam inquisicionem faciendam nostro pro testimonio duximus destinandum, qui tandem exinde ad nos reversi nobis consona voce retulerunt, ut ipsi in festo Conversionis Beati Pauli apostoli proxime preteritum in comitatu Vesprimiensi procedendo ab omnibus, quibus decuisset et licuisset, videlicet a vicinis et commetaneis ac nobilibus comprovincialibus talem scivissent veritatem, quomodo Michael de Alap, Thomas dictus Hwz de Challokwz, familiares seu officiales Ieronimi dicti Kolos de Nema castellani de Cheznek per ipsum in possessionibus Kegery et Zenthlaslo constituti una cum Benedicto de Vamhygh, altero Benedicto filio Petri et Iohanne filio Mathie de dicta Vamhegh, Georgio de Zenthlaslo et Iacobo filio Elie de Kegery iobbagionibus magnifici Ladislai bani Machoyensis filii condam Nicolai palatini de Gara in dictis possessionibus commorantibus, feria secunda proxima post festum Beati Pauli primi heremite proxime elapsi ex permissione et voluntate prefati domini Ladislai bani, domini ipsorum et dicti Kolos castellani manibus armatis et potenciariis ad faciem possessionis Koppan prefati domini abbatis et conventus loci eiusdem irruendo ibique quendam Andream Rufum, iobbagionem ipsius domini abbatis diris verberum et vulnerum plagis sauciando, ac unam manum sinistram confregissent; eo non contenti duos boves et unum equum una cum curru ipsius Andree de Koppan abstulissent, insuper quatuor boves Ladislai vilici et Anthoni filii Galli de eadem Koppan abstulissent ac alia bona ipsorum pro tunc erga ipsos habitos recepissent et ad possessionem Zenthlaslo deduxissent potencia eorum mediante in preiudicium ipsius domini Michaelis abbatis et conventus ac ipsorum iobbagionum dampnum valde magnum. Datum quinto die diei inquisicionis antedicte, anno Domini millesimo quadringentesimo tricesimo septimo.