...||
Nos Lodovicus, Dei gratia rex Hungarie, memorie conmendantes tenore presentium significamus, quibus expedit, universis, quod ad nostram personaliter accedens presentiam venerabilis et religiosus vir capellanus noster frater Siffridus, abbas monasterii Sancti Martini de Sacro Monte Panonie, suis nobis humilibus conquestione et petitione detexit, quod plures et presertim Nicolaus et Guillermus, bone memorie abbates, inmediati predecessores sui, iura et facta monasterii non, ut debuissent, viriliter et utiliter prosequentes, sed in multis inutiliter negligentes, cum diversis tam ecclesiasticis, quam secularibus personis possessionum permutationes fecissent, cum aliis conpositiones seu modos et conditiones concordiarum nocivas et inutiles inivissent et acceptassent et nonnulla etiam iura, proventus et redditus diversis vocabulis nuncupata seu nuncupatas per litteras eorum quibusdam nobilibus et aliis hominibus datas et concessas ab ipso monasterio alienassent et distraxissent et ad obligamina gravia et inpossibilia se et dictum monasterium in servandis huiusmodi conpositionibus distractibus inordinatis et indebitis per suas et conventus eorum ac etiam quorundam capitulorum et aliorum conventuum litteras astrinxissent et alia diversa et varia huiusmodi et hiis similia inordinata et illicita absque consensu, scitu et voluntate regie maiestatis, ad quam eiusdem monasterii patronatus pertinere dinoscitur, fecissent et assumpsissent et contraxissent in preiudicium moderni abbatis et conventus ac monasterii predictorum non modicum et iacturam. Qua videlicet conquestione premissa nostre maiestati supplicare curavit humili precum instantia idem abbas, ut predictas permutationes, conpositiones seu conditiones, obligationes, alienationesque et quosvis alios distractus absque nutu patroni in eiusdem monasterii lesionem intollerabilem atque dampnum per dictos predecessores suos inconsiderate et inprovide factas et assumptas seu contractas auctoritate regia et patronatus indempnitati sepedicti monasterii misericorditer consulentes irritare, revocare et cassare nostri litteris dignaremur. Nos igitur prenominati fratris Seffridi abbatis piis, iustis et honestis supplicationibus, ut regiam decet maiestatem et non solum ad dicti monasterii, sed et ad omnium ecclesiarum regni nostri provectum et indempnitatem dirigendum, conservandum et promovendum animo conpassibili liberaliter inclinati, ut prefatus abbas et conventus et monasterium illis possessionibus, libertatibus et iuribus, proventibusque et redditibus gaudere valeat, que et qui tam Sanctissimorum Stephani et Ladislai, quam aliorum illustrissimorum regum Hungarie, proavorum nostrorum et aliorum fidelium donationibus, collationibus et concessionibus eidem monasterio advenisse et ex antiquo pertinuisse nosscuntur, quicquid per antedictos quoscunque predecessores iam dicti Seffridi abbatis in premissis omnibus et singulis possessionum permutationibus, conpositionum illicitarum ac conditionum et obligaminum acceptationibus, iurium, reddituum ac proventuum quibusvis nominibus vocatorum alienatoribus et generaliter aliis quibuslibet nocivis, inpossibilibusque distractibus absque patroni consensu et scitu inordinate et indebite dinosscitur et est factum, simul cum litteris seu munimentis quorumlibet capitulorum aut conventuum et collegiorum super huiusmodi confectis presentium litterarum nostrarum vigore cassantes, anullantes et in irritum revocantes decernimus easdem litteras et munimenta, quecunque et quidquid ex hiis secutum est contra presentes, frivola, inania, cassa et ubicunque exhibita fuerint vigoribus caritura. Datum in Vissegrad, feria tertia proxima post festum nativitatis Sancti Iohannis Baptiste, anno Domini M° CCC° L° octavo. [1358. jún. 26.]||
...