Conmissio propria domine regine Thoma de Zeech supremo thesaurisario referente.||
Elisabet, Dei gratia regina Hungarie, Dalmatie, Croatie etc., Austrieque et Stirie ducissa, marchionissa Moravie etc., fidelibus nostris comiti vel vicecomiti et iudicibus nobilium comitatus Wesprimiensis salutem et gratiam. Veniens nostre maiestatis in presentiam venerabilis et religiosus vir dominus frater Michael, abbas de Beel de silva Bakoniensi, nostre exponere curavit serenitati gravi cum querela, quomodo Ieronimus Kolos de Nema, castellanus magnifici Ladislai de Gara, bani nostri Machoviensis, per ipsum in castro suo Chesnek vocato constitutus, necnon Dominicus de Byeb, officialis eiusdem Ladislai bani in possessione sua Porwa vocata dimissus, temporibus proxime preteritis ex conmissione et voluntate ipsius Ladislai bani, domini ipsorum, nonnullas silvas et terrarum arabilium et signanter prata Nyrmegh vocata intra veras metas possessionis ipsius domini abbatis et ecclesie sue Koppan vocate existentes et adiacentia minus iuste et indebite ac potentionaliter occupassent; preterea similiter hiis diebus iam novissime evolutis, puta feria sexta proxima ante festum Beati Martini episcopi et confessoris proxime preteritum [1438. nov. 7.] quidam Michael de Bogathy, familiaris eiusdem Dominici, ex conmissione et voluntate prefatorum Kolos et Dominici predicti domini sui, cum quibusdam suis complicibus et adherentibus universos porcos iobagionum eiusdem domini abbatis in ipsa possessione sua Koppan conmorantium ad possessionem ipsius Ladislai bani Fenyefew vocatam depelli fecissent et asportari, quosdam ex ipsis in usum convertissent, alios vero quo ipsorum placuisset voluntati fecissent et disposuissent, ceteraque indicabilia dampna et nocumentorum genera ipsi domino abbati intulissent et irrogassent, inferrentque et irrogarent de die in diem incessanter potentia mediante in preiudicium ipsius domini abbatis et dampnum valde magnum, Unde supplicavit maiestati nostre idem dominus abbas, ut sibi circa premissa remedium adhibere dignaremur opportunum. Et quia nos ipsum dominum abbatem sic indebite et iniuste dampna pati nolumus, fidelitati igitur vestre firmiter precipiendo mandamus, quatenus visis presentibus, rebusque sic uti [nostre] superius declarata sunt maiestati se habentibus, ex parte prefatorum Ieronimi Kolos ac Dominici eidem domino abbati super premissis ac premissorum singulis meri iuris et iustitie ac debite et indilate satisfactionis complementum adeo impendere et exhibere debeatis iustitia mediante, ut idem dominus abbas pro defectu iustitie super hiis de cetero non cogatur infestare maiestatem. Secus non facturi grave nostre sub obtentu. Presentibus perlectis exhibenti restitutis. Datum in opido nostro Thata vocato, die dominico proximo ante festum Beate Elizabet vidue, anno Domini millesimo quadringentesimo tricesimo octavo. [1438. nov. 16.]