Serenissimo principi domino Alberto, Dei gratia Romanorum regi semper augusto ac Hungarie, Bohemie, Dalmatie, Croatie etc. regi ac Austrie, Stirie duci, necnon marchioni Moravie, domino ipsorum gratioso capitulum ecclesie Iauriensis orationes in Domino debitas ac devotas cum perpetua fidelitate. Litteris vestris annualibus ad inquisitiones, evocationes, prohibitiones et ad omnia alia, que in talibus processibus iuxta regni consuetudinem de iure fieri consueverunt, facienda pro religioso viro domino fratre Michaele abbate et conventu monasterii Beati Maurici de Beel per anni circulum gratiose datis et concessis, nobis loquentibus sumpma cum obedientia receptis, iuxta quarum continentiam una cum Emerico de Chegle, homine vestro in prefatis litteris vestris annualibus inter alios homines vestros conscriptos expresse nominato, nostrum hominem, videlicet discretum virum dominum Petrum, rectorem altaris Sancti Iohannis Baptiste siti in predicta ecclesia nostra Iauriensi, ad infrascriptam inquisitionem faciendam nostro pro testimonio fide dignum duximus destinandum. Qui tandem exinde ad nos reversi nobis consona voce retulerunt, ut prefatus homo vester presente dicto nostro testimonio feria quarta proxima post festum Nativitatis Domini proxime preteritum [1438. dec. 31.] in comitatu Vesprimiensi procedendo ab omnibus, quibus decuisset et licuisset, videlicet a vicinis et conmetaneis ac nobilibus et ignobilibus eiusdem comitatus talem scivisset veritatem, quomodo Nicolaus iudex, Ladislaus Tauez, Paulus Thome, Paulus Ladislai, Benedictus faber, Iohannes Pauli, Iohannes Georgi, Petrus Palaskws, Gregorius faber, Michael Magnus, Iohannes Fodor, Thomas Parvus, Franciscus Borsathi, Paulus Anthoni, Ambrosius Anthoni, Anthonius vilicus, Michael, filius eiusdem, Bartholomeus faber, Matheus Thome, Stephanus faber, Fabianus Fenes, Andreas Fenes, Gallus Ewrdeg, Egidius Cheke, Petrus Andree, Georgius Hymhazy, Demetrius Valentini, Cosmas, Benedictus Toth, Ladislaus faber, Franciscus, Matheus Texe, Augustinus faber, Michael, Gregorius Texe, Iacobus Anthonii Hewerew, Elias, Bartus, Michael Georgi sartoris, Thomas, Michael Sebastiani, Anthonius, Gregoriiis, Emericus, Laurentius et Gregorius populi de Horhi, item Augustinus, Iohannes, Michael Anthoni, Dominicus faber, Elias, Emericus sclavus, Anthonius Saska, Stephanus Benedicti, Andreas Nicolai, Blasius, Gallus Farkas, Michael, Georgius, Laurentius Magnus, Dyonisius Pauli, Philipus, Valentinus Nemes, Gregorius Anthoni et Georgius populi de Nemethi iura et proventus ecclesie Sancti Maurici de Beel et per consequens abbatis et conventus loci eiusdem de lapidibus Kerteskw, Hegeskw, Feyerkw et Oduaskw ipsis provenientes a Sancto rege Stephano et aliorum regum (!) predicte ecclesie datas et concessas, scilicet mediam partem ferarum [que], a quocunque homine in predictis lapidibus interficerentur, predicte ecclesie dare et amministrare tenerentur, ipsi autem quam pluries predictos proventus potentialiter deportassent contra iura et libertates predicte ecclesie; eo non contenti feria sexta proxima ante festum Nativitatis Domini proxime preteritum [1438. dec. 19.] Iohannes et Michael litteratus cum canibus abbatis et conventus pro venationibus ad silvas transivissent ibique super duos cervos canes dimisissent et dum predicti cervi fatigati fuissent et ad lapides Feyerkw intrassent, ibique familiares predicti abbatis et conventus interfecissent, tunc predicti Nicolai iudex et Ladislaus Tauez una cum predictis populis et hominibus manibus armatis super predictos familiares abbatis irruissent, ipsumque Michaelem enormiter verberassent et vulnerassent, predictos autem cervos feras (!) ad eisdem recepissent et deportassent potentia ipsorum mediante in preiudicium ipsius domini abbatis et conventus valde magnum. Datum sexto die diei inquisitionis premisse, anno Domini millesimo quadringentesimo tricesimo nono. [1439. jan. 5.]