Nos Ambrosius de Hwzytoth vicecomes et iudices nobilium comitatus Vesprimiensis damus pro memoria, quod ad instantiam et legitimam petitionem religiosi viri domini fratris Michaelis, abbatis de Beel, nobiles viros Iacobum de Zentiwan et Stephanum de Chegle ad infrascriptam arbitrative adiudicationem proborum et nobilium virorum transmisissemus. Qui tandem exinde ad nos reversi nobis uniformiter retulerunt, quomodo die dominica proxima ante festum Sancti Benedicti abbatis [1440. márc. 20.] in Hagmasker in communi loco per nobilem virum Iacobum de Felfeld, castellanum de Batorkw, tamquam protectorem domini abbatis de Zyrcz in persona magnifici viri domini Nicolai de Palwtha, bani Machoviensis ac religiosi viri domini Michaelis, abbatis de Beel, predictum commune locum elegissent, ibique Albertus et Gregorius Zenthkiraly dictus de Pere in persona predicti Iacobi castellani ante probos et nobiles viros in predicto communi loco respondisset et proposuisset, quomodo religiosus vir dominus Michael abbas a provido viro Demetrio iobbagione abbatis de Zyrz, in eadem Zyrz residens (!), qui quidem Demetrius inibi personaliter fuisset, tunc cum idem Demetrius, scilicet anno preterito, [1439.] in possessione Akol iobbagio predicti abbatis fuisset, tunc idem Michael ab ipso Demetrio tria pecora cum uno vitulo, qui quidem non ipsius Demetrii, sed Stephani, fratris sui, fuissent, sine omnibus culpis suis ab eodem abstuli et recipi fecisset; tunc idem abbas ex adverso taliter respondisset, quod pro suis debitis, scilicet quinque florenis aureis et decem denariis ac una mensura tritici Iauriensi metreta mensurata ac muneribus et una domo novo edificata, necnon curiam suam et alias domos bono modo remittere debuisset et de predictis debitis nullam satisfactionem fecisset, domos et curiam ac ortum desolari premisisset, propter hanc causam dixit se recepisse; tamen idem Demetrius nec illo tempore, nec antea, nec post illud tempus dixisset, quod illa pecora alicuius fuissent nisi sua. Quo audito predicti probi et nobiles viri tali modo adiudicaverunt, quod idem dominus Michael abbas contra predictum Demetrium octavo die festi Sancti Stephani regis [1440. aug. 27.] sola sua in persona in sua ecclesia coram nostro testimonio debet prestare iuramentum, quod predicta pecora pro predictis debitis recipi fuisset; et si iuramentum prestaverit, tunc predicta pecora debent estimare (!) et si tantum non valuerint, tunc de superfluitate predicto domino abbati debet satisfacere coram nostro testimonio, hoc etiam adiecto, quod predictus Stephanus a predicto Demetrio mediante iustitia aquirat sua pecora; predicti autem Demetrius de predicta Zircz, Albertus et Gregorius Zenthkeraly de predicta Pere in persona domini ipsorum Iacobi castellani de predicta Batorkw predictis arbitrationibus et adiudicationis predictorum proborum et nobilium virorum contenti fuissent. Datum in Vasarhel, feria quinta proxima post festum Sancte Margarethe virginis, anno Domini millesimo quadringentesimo quadragesimo. [1440. júl. 14.]