Vö:||
Nos Benedictus Piber, provisor curie Budensis ac administrator bonorum ecclesie Sancti Martini Sacri Montis Pannonie et conventus loci eiusdem memorie commendamus tenore presencium significantes, quibus expedit, universis, quod nos consideratis serviciis, que circumspectus Bartholomeus Porcolab dictus civis civitatis Albe Regalis predicte ecclesie fecit et que in posterum fideliter facere pollicitus est, matura superinde inter nos deliberacione prehabita, quoddam predium ecclesie prefate Zenthmarthonfewldew vocatum a parte occidentali penes possessionem Malomsar in comitatu Wesprimiensi habitum et existens, nunc habitatoribus et adificiis destitutum cum omnibus utilitatibus et pertinenciis, videlicet pratis, fenetis, terris arabilibus cultis et incultis, silvis, nemoribus, montibus, vallibus, aquis, aquarumque decursibus, molendinis molendorumque locis ac generaliter omnium et quarumlibet utilitatum integritatibus ad idem predium spectantibus sub suis veris metis et terminis, quibus hactenus per eandem ecclesiam nostram tentum est et possessum prefato Bartholomeo Porkolab et Thome, filio quondam Valentini de Santhazeg fratri eiusdem carnali ipsorumque heredibus et posteritatibus universis utriusque sexus in perpetuum fewdum locavimus et contulimus tali condicione mediante, quod ipsi edificatis domibus, molendinis curia et aliis pro usu humano necessariis in superficie dicti predii racione eiusdem ad luminaria dicte ecclesie nostre a dato presencium singulis annis sedecim marcas cere semper in festo Beati Michaelis archangeli iidem Bartholomeus Porkolab et Thomas filius quondam Valentini ipsorumque posteritates custodi prefate ecclesie Sancti Martini solvere et amministrare teneantur. Quod si dictas sedecim marcas cere per duos integros annos post sese immediate sequentes aliqua temeritate ducti non persolverent ipsi custodi ecclesie nostre predicte quoquo modo, ex tunc eo facto ipsi Bartholomeus Porkolab et Thomas, filius Valentini aut eorum heredes cadant a iure dicti predii. Hoc eciam specialiter declarato, quod idem Bartholomeus Porkolab et Thomas, filius Valentini aut eorum heredes a regia maiestate vel aliis principibus regni Hungarie super dicto predio nullas literas donacionales vel confirmatorias vel alias, que successu temporum iura ecclesie Sancti Martini possent perturbare, procurare audeant et nec impignorare aut quoquomodo alienare in toto vel in aliqua sui parte valeant, quod si compertum fuerit, eo facto idem Bartholomeus Porkolab et Thomas, filius Valentini et ipsorum heredes cadant a dominio dicti predii ac in estimacione perpetuali totalis predii predicti convincantur et convinci debeant ipso facto. Imo damus et locavimus in perpetuum fewdum irrevocabiliter possidendum pariter et habendum adiecto eciam, quod post decessum predictorum Bartholomei et Thome ipsorumque heredum absque ulla difficultate prescriptum predium cum suis, ut premittitur, omnibus utilitatibus et fructuositatibus universis ad dictam ecclesiam Sancti Martini devolvantur omni iure. In cuius rei memoriam firmitatemque perpetuam presentes literas nostras privilegiales pendentis et authentici sigilli nostri munimine roboratas eisdem Bartholomeo Porkolab et Thome, filio Valentini et heredibus ipsorum universis per cisuram alphabeti duximus concedendas. Datum in festo Beati Laurencii martyris, anno Domini millesimo quadringentesimo septuagesimo nono. [1479. aug. 10.]