In Dei filio sibi charissimo domino Matheo literato de Saxardia, frater Ioachinus turrianus Venetus sacre theologie professor ac tocius ordinis Predicatorum humilis magister et servus salutem in Domino sempiternam. Quamvis ex charitatis debito omnibus in spiritualibus teneamur: illis tamen longe amplius obligamur, quorum dileccionem certis beneficiorum iudiciis frequencius experimur. Proinde devocionis vestri sinceritatem attendentes, quam ob Dei omnipotentis reverenciam et Beatissimi patris nostri Dominici merita ad nostrum geritis ordinem sacrum veluti clara experiencia et relatione cognovimus, dignum fore putamus ac divine acceptabile voluntati, ut ab ipso ordine nostro prerogativam senciatis spiritualium graciarum. Verum quia nudi bonis temporalibus charitis vestre subsidiis dignam rependere vicem temporaliter nequaquam valemus, spiritualibus nichilominus recompensare affectamus. Qua propter vos ad confraternitatem nostri ordinis assumentes vobis omnium missarum, orationum divinorum officiorum, vigiliarum, abstinenciarum, ieiuniorum predicacionum, studiorum, contemplacionum, laborum, ceterorumque bonorum, que per fratres et sorores tocius ordinis operabitur, clemencia Salvatoris in vita pariter et in morte tenore presencium participacionem concedimus specialem, ut sic multiplici suffragiorum suffultuspresidio hic in presenti augmentum gracie et in futuro mereamini vite eterne premium perhenniter possidere. In quorum omnium fidem, robur et testimonium sigillum officii mei duxi presentibus opponendum. Datum Veneciis in conventu nostro Sanctorum Iohannis et Pauli martirum quinto die Iunii anno Domini MCCCCXCIII. [1493. jún. 5.]