Alexander episcopus, servus servorum Dei, dilecto filio Matheo Taolna (!) clerico Quinqueecclesiensi, salutem et apostolicam benediccionem. Apostolice sedis circumspecta clemencia, ne provisiones per eam de ecclesiis et monasteriis pro tempore facte valeant quomodolibet impugnari, sed persone ad illa promote illis puro corde et sincera consciencia presidere valeant, remedia prout convenit, adhibet oportuna. Cum itaque nos hodie intendamus de persona tua nobis et fratribus nostris ob tuorum exigenciam meritorum accepta monasterio Sancti Martini Sacri Montis Panonie Ordinis Sancti Benedicti Iauriensis diocesis, certo modo vacanti de fratrum eorun dem consilio providere teque illi in abbatem preficere, nos cupientes, ne provisio et prefectio nostre predicte valeant invalide reputari, si forsan aliquibus censuris ecclesiasticis innodatus existis, providere tuis in hac parte supplicacionibus inclinati, te a quibuscunque excommunicacionis, suspensionis et interdicti aliisque ecclesiasticis sentenciis, censuris et penis a iure vel ab homine quavis occasione vel causa latis, si quibus quomodolibet innodatus existis, ad hoc dumtaxat, ut provisio et prefeccio predicte ac singule littere desuper conficiende suum debitum sorciantur effectum, auctoritate apostolica tenore presencium absolvimus et absolutum fore nunciamus, non obstantibus constitutionibus et ordinacionibus apostolicis ac monasterii et Ordinis predictorum iuramento, confirmacione apostolica vel quavis firmitate alia roboratis, statutis et consuetudinibus ceterisque contrariis quibuscunque. Nulli ergo omnino hominum liceat hanc paginam nostre absolucionis et nunciacionis infringere vel ei ausu temerario contraire. Si quis autem hoc attemptare presumpserit, indignacionem omnipotentis Dei ac Beatorum Petri et Pauli apostolorum eius, se noverit incursurum. Datum Rome apud Sanctum Petrum anno incarnacionis dominice millesimo quingentesimo quartodecimo Kalendas Octobres, pontificatus nostri anno nono. [1500. szept. 18.]