Petrus, miseracione divina tituli Sancti Ciriaci in Thermis sacrosancte Romane ecclesie presbyter cardinalis Reginus, ad Hungarie, Bohemie et Polonie regna, necnon Prussiam, Russiam, Livoniam, Littvaniam, Valachiam, Slesiam, Lusaciam, Morawiam, Transilvaniam, Sclavoniam, Dalmaciam, Croaciam, Corbaviam et Moscoviam omnesque et singulas illarum et regnorum predictorum provincias, civitates, terras atque loca subiecta et alia eis adiacencia apostolice sedis legatus, dilecto nobis in Chrosto abbati monasterii Sancti Martini Sacri Montis Pannonie, Ordinis Sancti Benedicti, Iauriensis diocesis salutem in Domino sempiternam. Cum a nobis, petitur, quod iustum est et honestum, tam vigor equitatis, quam ordo exigit racionis, ut id per sollicitudinem officii legacionis nostre ad debitum perducatur effectum. Exhibita nobis nuper pro parte vestra peticio continebat, quod bone memorie Nicolaus, episcopus Ostiensis et Velletriensis, tunc apostolice sedis legatus, eiusdem monasterii abbate pro tunc existente in concilio regni Hungarie Bude celebrato refferente, quod nobiles et alii homines comitatus Simigiensis decimas per eos et ipsorum iobagiones eidem monasterio secundum institucionem regum eiusdem, regni illiusque consuetudinem debitas dare et solvere recusassent, eisdem nobilibus per suas certi tenoris literas comisit et mandavit, ut decimas huiusmodi per eos non solutas dicto abbati solverent et satisfaceient eciam de eisdem, alioquin eidem abbati dictas decimas non solventes et solvere recusantes excommunicandi et illos ab ingressu ecclesiarum omnino prohibendi, donec de huiusmodi decimis satisfecissent, per easdem literas, prout in illis plenius dicitur contineri, auctoritatem dedit atque concessit. Quas quidem literas a nobis auctoritate nostra peciistis munimine roborari. Nos igitur huiusmodi supplicacionibus vestris inclinati literas prefatas, quatenus fuit in usu, auctoritate apostolica, que fungimur in hac parte, confirmamus et presentio scripti patrocinio communimus. Datum Bude Vesprimiensis diocesis sub nostro solito sigillo, anno incarnacionis dominice millesimo quingentesimo secundo, quinto decimo Kalendas Iunii [1502. máj. 18.] pontificatus sanctissimi in Christo patris et domini nostri domini Alexandri divina providencia pape sexti anno decimo.