Wladislaus, Dei gracia rex Hungarie, Bohemie etc. fideli nostro reverendissimo in Christo patri domino Thome, tituli Sancti Martini in montibus sacrosancte Romane ecclesie presbytero cardinali Strigoniensi act summo et secretario cancellrio nostro etc. salutem. Cum nos Deo et eius gracia duce Ordinem Sancti Benedicti, qui a multis annis retroactis satis dissolute stetit, prout paternitas vestra optime novit, reformare instituerimus, eiuscemodique refomacionis officium fideli nostro venerabili et religioso fratri Matheo, abbati Sancti Martini Sacri Montis Pannonie exercendum commisserimus, ex eiusdem relacione accepimus nonnullos esse fratres eiusdem Ordinis minus religiose in ecclesiis suis viventes, qui nec edificant, nec fratres, prosit deberent, tenerent, sed neque habitum religionis deferrent, quos idem frater Matheus abbas ad observacionis normam minime astringere posset, cum alioquin idemipsi fratres nec observanciam Ordinis neque censuras eiusdem Ordinis curarent, propter quod supplicavit maiestati nostre idem abbas, ut ad execucionem huiusmodi salutaris propositi nostri, cuius ipse abbas par non esset, paternitatem vestram reverendissimam in partem sollicitudinis sue preficeremus, cuius auctoritate et opera fratres ipsi protervi et inobedientes ad salutaris obediencie normam reducerentur. Cui a nobis potenti negare non potuimus id, ad quod nos eiusce rei bene gerende occasio inducebat. Propterea fidelitatem vestram requirimus et rogamus, ut dum et quocienscunque paternitas vestra per prefatum abbatem vel loco eiusdem Ordinis nomine requisita fuerit, continuo in his et aliis omnibus negociis factum eiusdem Ordinis concernentibus ipsi abbati adiutorio esse velitis et fratres minus religiose viventes et edificia in monasteriis suis facere recusantes fratresque tenere non curantes atque habitum religionis deferre detrectantes ad premissa facienda cogatis et compellatis et provideatis, ut tales protervi fratres a modo religionis formam et habitum suscipiant et deferant, sanctorum patrum constituciones sub privacione eiuscemodi suorum beneficiorum tenere et observare et omnia, quo circa premissa necessaria fuerint, secundum Deum exequi velitis et debeatis. Si qui autem ex huiusmodi fratribus fierent, qui vestris, imo verius nostris mandatis in hac parte obtemperare recusarent, tales ecclesiis et beneficiis eorum privare debeatis auctoritate nostre regia presentibus vobis in hac parte attributa vestraque ordinaria iureque et iusticia mediantibus. Secus non facturi; presentibus perlecti exhibenti restitutis. Datum Bude feria sexta proxima ante festum Nativitatis Beati Iohannis Baptiste, anno Domini millesimo quingentesimo quinto. [1505. jún. 20.]||
Commissio propria domini regis.