Serenissimo principi et domino domino Wladislao, Dei gratia regi Hungarie et Bohemie etc., domino nostro gratiosissimo capitulum ecclesie Iauriensis orationum suffragia devotarum perpetua cum fidelitate. Vestra noverit serenitas nos binas litteras maiestatis vestre, unas nobis exhibitorias, alteras venerabili et religioso fratri Iacobo, abbati ecclesie de Beel, preceptorie sonantes honore et reverentia, quibus decuit, recepisse. Quarum quidem litterarum exhibitoriarum, videlicet nobis sonantium tenor talis est:||
Wladislaus, Dei gratia rex Hungarie et Bohemie etc., fidelibus nostris capitulo ecclesie Iauriensis salutem et gratiam. Mandamus fidelitati vestre harum serie firmiter, quatinus alias litteras nostras preceptorie fideli nostro venerabili et religioso fratri Iacobo, abbati ecclesie de Beel, sonantes pro parte nobilium Valentini de Chaytha et domine Katherina, consortis eiusdem, filie videlicet condam Martini de Chala confectas cum presenfibus vobis exhibendis per vestrum testimonium fide dignum eidem exhiberi et presentari faciatis. Qui si personaliter reperiri poterit, bene quidem, alioquin de domo habitationis sue, sive solite eiusdem residentie amoneat eundem, dicatque et committat eidem verbo nostro regio, ut ipse ad tricesimum secundum diem diei exhibitionis prescriptarum litterarum nostrarum preceptoriarum sibi fiende computando coram nostra maiestate, ubi Deo duce tunc constituemur, personaliter vel per procuratorem suum legittimum absque ulteriori procrastinatione comparere debeat et teneatur ad contenta querimoniarum prefatarum exponentis in dictis litteris nostris preceptorie contentarum responsurus, iobagiones etiam suos in eisdem litteris nostris preceptoriis eidem statuere commissos, prout ad ipsum pertinet, nichilominus statuere conmittendo, aliasque a nobis finalem deliberationem, digneque satisfactionis complementum recepturus; secus non facturi. Datum Bude, feria quarta proxima ante festum Beate Lucie virginis et martiris, anno Domini millesimo quingentesimo decimo quinto. [1515. dec. 12.]||
Alterarum vero preceptoriarum series sequitur et est talis:||
Wladislaus, Dei gratia rex Hungarie et Bohemie etc., fideli nostro venerabili et religioso fratri Iacobo, abbati ecclesie de Beel, salutem et gratiam. Exponitur maiestati nostre in personis nobilium Valentini de Chaytha et domine Katherine, consortis eiusdem, filie condam Martini de Chala, quomodo circa festum Beati Ladislai regis et confessoris in anno proxime transacto preteritum, [1515. jún. 27.] tu, nescitur quibus respectibus, missis et destinatis providis Simone Ispan in possessione Kayar, necnon Andrea ac Michaele Thymar, Anthonio Kys, Gregorio Karys, Petro Chapo, Alberto Lazy, Matheo et Benedicto Chapo et Valentino Ambrus, iobagionibus tuis in portione tua possessionaria in possessione Tharyan vocata, omnino in comitatu Iauriensi existenti, commorantibus, manibus armatis et potentiariis ad domum et curiam nobilitariam ipsorum exponentium in portione eorumdem possessionaria in eadem possessione Tharyan existenti habitas, ibique confractis et dissecatis hostiis eiusdem domus, prefatos exponentes in penetrabilioribus locis eiusdem domus ad mortem querentibus et, si eosdem ibidem invenire potuissent, nece crudelissima interimissent, tu vero interimi fecisses potentia mediante in preiudicium et dampnum ipsorum exponentium valde magnum. Supplicatum itaque extitit maiestati nostre pro parte dictorum exponentium, ut ipsis circa premissa de opportuno iuris remedio providere dignaremur. Quia autem iuxta contenta generalis decreti nostri superinde editi et stabiliti huiusmodi actus potentiarii extra terminos octavales et brevium iudiciorum per nostram maiestatem decidi debent et terminari, mandamus igitur fidelitati tue harum serie firmiter, quatinus habita presentium notitia ad tricesimum secundum diem a die exhibitionis presentium tibi fiende computando coram nostra, ubicunque Deo duce tunc constituemur, absque ulteriori procrastinatione personaliter aut per procuratorem tuum legittimum comparere modis omnibus debeas et tenearis rationem de premissis redditurus efficacem, prescriptos etiam iobagiones tuos tibi statuere conmittendo. Nam alias certus sis, quod, si secus facere attemptaveris, nos ad partis comparentis instantiam id faciemus in premissis, quod dictaverit ordo iuris. Secus non facturus; presentibus perlectis exhibenti restitutis. Datum Bude, feria quarta proxima ante festum Beate Lucie virginis et martiris, anno Domini millesimo quingentesimo decimo quinto. [1515. dec. 12.]||
Nos itaque mandatis maiestatis vestre in omnibus obedire cupientes, ut tenemur, nostrum hominem, videlicet discretum Martinum de Labad, presbiterum et rectorem altaris Sancte Katherine virginis et martiris in eadem ecclesia nostra Iauriensi fundati, ad premissa fideliter peragenda nostro pro testimonio fide dignum duximus transmittendum. Qui tandem exinde ad nos reversus nobis retulit eo modo, quo modo ipse dominico die ante festum Nativitatis Domini proxime preterito [1515. dec. 23.] prescriptas litteras maiestatis vestre preceptorie modo premisso dicto fratri Iacobo abbati sonantes in eadem abbatia sua personaliter reperto exhibuisset et presentasset, amonuissetque eundem, dixissetque et conmisisset eidem verbo vestro regio, ut ipse ad tricesimum secundum diem diei exhibitionis prescriptarum litterarum vestrarum preceptoriarum sibi fiende computando coram maiestate vestra, ubicunque tunc Deo duce eadem constituetur, personaliter vel per procuratorem suum legittimum absque ulteriori procrastinatione comparere debeat et teneatur ad contenta querimoniarum dictorum exponentium in eisdem litteris vestris preceptoriis contentarum responsurus, iobagiones etiam suos in eisdem litteris vestris preceptoriis eidem statuere conmissos, prout ad ipsum pertinent, nichilominus statuere conmittendo, aliasque a vobis finalem deliberationem, debiteque satisfactionis complementum superinde recepturus. Seriem igitur executionis nostre et quicquid in premissis fecimus maiestati vestre fideliter rescripsimus. Datum feria tertia proxima post octavas Epiphaniarum Domini, anno eiusdem millesimo decimo sexto. [1516. jan. 15.]||
[Hátán:] Ista pars comparuit in termino prefixo absente parte adversa, sed causa ista prorogata est infra adventum magistrorum prothonotariorum ad octavas etc.