Serenissimo principi ... Ludovico, Dei gracia regi Hungarie etc. ... capitulum ecclesie Iauriensis ... Noverit maiestas vestra nos literas magnifici domini comitis Petri comitis de Sancto Georgio et de Bozin iudicis curie eiusdem maiestatis vestre ... recepisse sub tenore:||
Amicis suis ... capitulo ecclesie Iauriensis ... Dicitur nobis in persona magnifici domini Iohannis Bornemisza de Berzencze, comitis Posoniensis et castellani castri Budensis, quod quamvis annis superioribus quedam possessio egregii quondam Iohannis Danch de Zerdahel Chechen vocata ac predia Fwd et Tenew appellata omnino in comitatu Iauriensi existencia et habita cum ipsorum cunctis utilitatibus quondam Georgio, fllio olim Iohannis Kaczor de Lak, pro centum florenis auri puri Hungaricalibus boni, veri et iusti ponderis titulo pignoris obligata extiterint hoc modo, ut dum et quandocunque memoratus Iohannes Danch aut sui heredes et successores universi dictam possessionem Chechen ac predia antedicta ab eodem Georgio Kaczor aut suis heredibus pro predictis centum florenis rerum estimacione exclusa redimere vellent, semper liberam redimendi haberent libertatis facultatem. Quia tamen prenominata possessio Chechen ac predia supradicta medio tempore ad manus venerabilis Mathei abbatis et conventus ecclesie Sancti Martini Sacri Montis Pannonie eodem titulo pignoris quodammodo deventa extitisset redemcioque pretitulate possessionis Chechen ac predictorum prediorum antefatum dominum Iohannem Bornemisza iure successorio ac vigore cuiusdam contractus cum egregio quondam Paulo Danch de dicta Zerdahel facti et celebrati magis quam alios concernere dignosceretur et ob hoc ipse idem Iohannes Bornemisza exponens prenominatis Matheo abbati et conventui ecclesie Sancti Martini in sortem redempcionis eorundem possessionis Chechen, necnon prediorum Fwd et Tenew ducentos florenos paratis et enumeratis in pecuniis solvisset. Et licet iidem Matheus abbas et conventus dicte ecclesie Sancti Martini levatis prius ab eodem Iohanne Bornemisza dictis florenis ducentis medietatem dicte possessionis Chechen a parte occidentali existentem et adiacentem vigore certarum literarum eiusdem conventus superinde confectarum, medietates vero dictorum prediorum verbis duntaxat et non virtute aliquarum literarum fassionalium memorato Iohanni Bornemisza remiserint et resignaverint, tamen iidem abbas et conventus reliquas medietates dicte possessionis Chechen ac prediorum antedictorum apud se minus iuste et indebite reservassent, reservarentque eciam modo potencia mediante in preiudicium et damnum prenominati exponentis valde magnum. Super quo vestram amiciciam presentibus petimus diligenter, quatenus vestrum mittatis hominem pro testimonio fide dignum, quo presente Iob de Koronczo sev Balthazar Haghmas sev Georgius de eodem sive Iohannes Chege de Nagh Barathy aut Iacobus de Enese aliis abstentibus homo regius erga prenominatos Matheum abbatem et conventum accedendo admoneat eosdem dicatque et committat eisdem verbo regio, ut ipsi predictas medietates antefate possessionis Chechen et prediorum Fwd et Tenew indebite apud se reservatas et eidem exponenti ad suas peticiones non remissas eidem exponenti remittere et resignare deberent et tenerentur. Qui si fecerint, bene quidem, alioquin prohibeat eosdem ab ulteriore earundem detencione et reservacione, percepcione seu percipifaccione et nihilominus evocet eosdem abbatem et conventum dicte ecclesie Sancti Martini contra annotatum exponentem ad tricesimum secundum diem a die huiusmodi evocacionis exhinc fiende computando regiam in presenciam racionem superinde reddituros efficacem; litis pendencia, si qua foret inter ipsos, non obstante; insinuando ibidem eisdem, ut sive ipsi termino in predicto coram prefato domino nostro rege compareant sive non, idem dominus noster rex ad partis comparentis instanciam id faciet in premissis, quod iuri videbitur expediri. Et post hec huiusmodi admonicionis, prohibicionis, evocacionis et insinuacionis seriem cum admonitorum, evocatorum et insinuatorum nominibus terminum ad predictum, ut fuerit expediens, prefato domino nostro regi suo modo fideliter rescribatis. Datum Bude feria tercia proxima post festum Exaltacionis Sancte Crucis, anno Domini MDXVII. (1517. szept. 15.) ||
Nos ... peticionibus ... obedire volentes, una cum ... Georgio de Koronczo ... nostrum hominem ... Paulum presbyterum de Rewkomaron, rectorem altaris Sancti Colomani martyris in ... ecclesia ... Iauriensi fundati ... duximus transmittendum. Qui ... reversi ... retulerunt, ... qualiter ipsi sabbatho proximo ante festum Beati Mathei apostoli et evangeliste ad ... Matheum ... et conventum ... intra castrum Sancti Martini accessissent, ... ipse homo vester ... ammonuisset, ut prefatas possessiones ... remittere et resignare deberent ... Quia ... hoc facere recusassent, ... evocasset eosdem ... ad tricesimum secundum diem ... Datum feria quarta proxima post festum Beati Mathei ... anno supradicto. [1517. szept. 23.]