Nos Matheus Dei et apostolice sedis gracia abbas et conventus monasterii Sancti Martini Sacri Montis Pannonie recognoscimus per presentes literas nostras, quod quia serenissimus dominus noster dominus Lodovicus rex Hungarie et Bohemie etc. et dominus noster graciosissimus nobis declaravit unacum consimilatis (!) suis egregios Iohannem de Thad et Petrum Kelevith banatum Iaycensem acceptare novisse, item ut castellum Aparoch ad nostrum Ordinem pertinens, quod nunc ex impignoracione ad manus egregii Georgii Korlatowith existit, redimi et ab eis ad cursum temporis teneri permittatur; hortataque est nos maiestas regia et rogavit, mandavitque firmiter, ut in redempcionem et tradicione predicti castelli Aparoch ad manus predictorum banorum aliquam difficultatem non (!) faceremus, ne Iaycensem propterea perire contingeret. Noluit autem hoc quoque maiestas sua, ut prefato Georgio Korlatowith literas nostras expeditare daremus et assecuraremus eum nunquam nos eum nec litibus nec aliis modis turbaturos propter restitucionem huius castelli ad manus alienas. Unde licet molestum nobis et grave admodum sit, quod castellum ipsum ad manus banorum tradi debeat, tamen volentes maiestatis sue regie voluntati et mandato, ut bonos et religiosos capellanos decet, satisfacere, considerantes denique regni pericula, que omnino, si aliter fieret, dicuntur evenire, hoc eciam attento, quod maiestas sua regia ultro literis suis regiis policeatur se non passurum, ut hoc castellum a nobis et ab Ordini nostro alienetur aut dissolvetur, propterea his moti racionibus id prefato Georgio Korlatowith concessimus et per presentes literas nostras concedimus, ut ipse prefatum castellum Ordinis nostri Aparoch ad manus predictorum banorum Iacensium (!) iuxta ordinacionem contentaque literarum maiestatis sue pro salute huius regni ad tempus, recepta ab eis prius pecunia sua, pro qua illud a nobis oppignoratum tenet, libere tradere et resignare possit. Ita tamen, quod si elapso anno nos et Ordo noster pecuniam per ipsum Georgium Korlathowith ab eisdem banis recepturam ipsis restituere possumus, eundem (!) castellum rursus iuxta ordinacionem sue maiestatis nobis et Ordini nostro remittere debeant et teneantur. Quem quidem Georgium Korlathowith nos assecuramus presentibus literis nostris, quod nunquam propterea lites aliquas contra ipsum aut heredes posterosque suos movebimus, sed tacite et pacifice sustinebimus hanc resignacionem castelli Aparoch, quem (!) ipse de consensu nostro secundum regie maiestatis et sui consilii deliberacionem ad manus predictorum banorum Iaycensium est facturus. Salva tamen, ex quo illud castellum a nobis Ordineque nostro invidis (!) aufferetur, semper consciencia nostra remanente, harum nostrarum vigore et testimonio literarum mediante. Datum feria secunda proxime (!) post festum Beati regis Stephani, anno Domini MDXIX. [1519. aug. 22.]