Capitulum ecclesie Iauriensis ... ad universorum ... noticiam ... volumus ... pervenire, quod honorabiles et relligiosi (!) fratres Georgius de Zalavar prior et Urbanus de Feldwar cellerarius, presbyteri professi monasterii Sancti Martini Sacri Montis Pannonie Ordinis Sancti Benedicti monachi pro se personaliter, ac pro reverendo in Christo patre Matheo abbate et toto conventu dicti monasterii Sancti Martini cum plena facultate et procuratoriis literis eorundem ab una parte, siquidem ex altera nobilis Nicolaus Kalthy de Kalthaza pro se similiter et pro nobilibus Mathia, Oswaldo et Petro filiis ac domina Katharina, consorte Mathei Was et puellis Petronella, Barbara et Anna filiabus suis sine procuratoriis literis, onera tamen et quelibet gravamina eorundem omniumque fratrum, proximorum et consanquineorum suorum idem Nicolaus et ambe partes quorumlibet, quos infrascriptum tangeret, seu quovismodo concernere posset negocium per omnia super se assumendo coram nobis personaliter constituti sponte et libere animoque, uti dixerunt, ad id bene deliberato confessi sunt et retulerunt eomodo, quod licet inter prefatos dominum Matheum abbatem et totum conventum Sancti Martini ab una, ac prefatum Nicolaum Kalthy suosque heredes prenominatos partibus ex altera de et super totalem porcionem possessionariam nobilis quondam Michaelis Kalthy fratris ipsius Nicolai Kalthy condivisionalis in dicta possessione Kalthaza in comitatu Wesprimiensi existente habita, quam scilicet porcionem possessionariam alias iidem dominus Matheus abbas et conventus a prefato quondam Michaele vigore aliarum literarum nostrarum fassionalium superinde confectarum perpetue empcionis titulo pro se acquisivisse dinoscuntur, certe dure lites, dissensiones et controversie mote et suscitate et tam in curia domini regis, quam eciam aliis personis iudiciariis agitate et ventillate fuissent; tamen eedem partes animo perpendentes, quod licium eventus dubii sunt volensque ipse et presertim prefati dominus abbas et conventus paupertati ipsius Nicolai Kalthy cogitata expensis eorum parcere, propria ipsorum, uti dixerunt, ac aliorum proborum ordinacione et composicione ad talem pacis et concordie devenissent unionem perpetue duraturam, prout devenerunt et concordaverunt coram nobis: quod scilicet primitus annotati fratres Georgius et Urbanus virtute prenominati mandati specialis annotatum Nicolaum Kalthy et suos heredes in tutelam et proteccionem annotatorum domini Mathei abbatis et suorum successorum ac totius conventus Sancti Martini receperunt; et ambe partes se se mutuo et alternatim de omnibus et singulis causis, litibus et controversiis, dampnis et expensis racione previa undecunque et qualitercunqne usque ad hec tempora secutis quittos, expedittos (!) ac modis omnibus absolutos reddidissent et commisissent; universas eciam literas exhibitorias, inquisitorias, evocatorias et alias quoslibet causales, vanas, cassas, frivolas, inanes exhibentique nocituras reliquissent, prout reliquerunt et commiserunt nostri in presencia. Et nichilominus sepefati fratres Georgius et Urbanus in ipsorum ac quorum supra nominibus sessionem nobilitarem memorati quondam Michaelis in facie dicte possessionis Kalthaza habitam simul cum omnibus silvis, rubetis ac terris arabilibus ad eandem de iure et ab antiquo spectantibus et pertinere debentibus annotato Nicolao Kalthy et suis heredibus iure simpliciter de factoque remiserunt et resignarunt.||
E converso vero idem Nicolaus Kalthy tot et tantorum beneficiorum ipsorum domini Mathei abbatis et conventus sibi impensorum et in futurum impendendorum immemor esse nolens, suo et dictorum filiorum suorum nominibus quoddam pratum seu fenile suum et dicti quondam Michaelis Kalthy in territorio annotate possessionis Kalthaza Thywysses Reth alias Kerekthorethe appellatum, cui scilicet prato orientali eiusdem Nicolai Kalthy, australi nobilis Emerici Kalthy, occidentali eorundem Nicolai et Emerici et a septentrionali plagis incolarum possessionis Zenth-Myklos prata dicuntur vicinari, quod scilicet pratum eedem partes de ipsorum pari voluntate a predictis partibus ereccionibus novarum metarum consignassent, similiter pure et simpliciter absque omni strepitu iuris eisdem domino Matheo abbati et conventui remisisset, dedisset, donassetque et perpetuo possidendum contulisset, prout remiserunt, resignarunt et contullerunt (!) in alterutrum similiter coram nobis. Et id item idem Nicolaus illi vendicioni seu inscripcioni prati seu fenilis, quod alias venerabilis et relligiosus (!) frater Sebastianus prior claustri Sancte Marie Magdalene de Nadasd ordinis Sancti Augustini intra metas eiusdem possessionis Kalthaza annotatis domino abbati et conventui Sancti Martini vendiderat, de cuius prati vendicione in aliis literis nostris clarius continetur, suum benevolum consensum prebuit pariter et assensum. Preterea de alterius quoque prati seu fenilis redemcione, quod scilicet pratum alias annotatus quondam Michael Kalthy provido Emerico Kelemen de Lazy pignoris titulo inscripserat, eosdem dominum abbatem et conventum liberos commisit, tali vinculo obligaminis mediantis interposito, quod si qua parcium predictam composicionem, ordinacionem et unionem in toto vel in parte infringeret et pro rato atque firmo non teneret, ex tunc talis pars contra alteram in ipsa pacifice persistentem ante cuiuslibet litis ingressum rerumque estimacione quarumlibet seclusa in ducentos florenos Hungaricales et estimacione ambarum porcionum possessionariarum dictorum scilicet Nicolai et Michaelis Kalthy predictorum convincatur et convicta habeatur.||
Hoc eciam non pretermisso, quodsi memorati dominus Matheus abbas vel sui successores abbates seu conventus aliquam novam occupacionem terrarum arabilium, pratorum seu fenilium in dicta possessione Kalthaza vel pertinenciis eiusdem committerent vel fieri procurarent, ex tunc mox et de facto in premissis obligaminibus et vinculis ac estimacione earundem terrarum occupatarum convincantur et convinci debeant quodque sub eisdem vinculis et obligacionibus prefati dominus Matheus abbas et conventus vel ipsorum successores ab aliquo fratrum, heredum vel consanguineorum annotati Nicolai aliquam porcionem possessionariam magnam vel parvam absque scitu permissioneque annotati Nicolai Kalthy in ipsa possessione Kalthaza emere, neque eciam ipse Nicolaus Kalthy vel sui heredes et posteritates preter scitum et voluntatem annotatorum domini abbatis et conventus cuiquam perpetue vendicionis titulo inscribere presumant.||
Ad que premissa observanda iidem fratres Georgius et Urbanus se et dictos dominum Matheum abbatem et conventum virtute prenominati specialis mandati, annotatus vero Nicolaus Kalthy se et suos heredes ac fratres personali sua adstancia coram nobis obligarunt.||
In cuius rei memoriam firmitatemque perpetuam presentes literas nostras in pargameno sub pendenti sigillo nostro confectas duximus concedendas. Datum in festo Beati Antonii confessoris anno MDXIX. [1519. jún. 13.]