Iauriensis.||
Ia(cobus) Gothfredus.||
Beatissime Pater! Licet devotus orator vester Matheus, modernus abbas monasterii Sancti Martini Sacri Montis Pannonie Ordinis Sancti Benedicti Iauriensis diocesis, sedi apostolice inmediate subiecti tam vigore statuti in generali concilio editi, quam ex privilegiis apostolicis, per diversos Romanos pontifices sanctitatis vestre predecessores dicto monasterio concessis, et permissione inclite memorie Wladislai regis Ungarie, quam ex antiqua et legitime prescripta consuetudine habuerit et habeat ius celebrandi capitulum generale de triennio in triennium et ad illud omnes et singulos abbates, priores, prepositos monasteriorum dicti Ordinis in dicto regno et partibus sibi subiectis et ubivis constitutis convocandi ac rebelles et inobedientes cohercendi, de reformatione Ordinis et observantia regulari tractandi et quecunque ad huiusmodi convocacionem et celebrationem generalis capituli necessaria, faciendi, nichilominus, cum idem orator triennio revoluto generale capitulum pro incepte reformacionis salubri continuacione vellet celebrare et se ad id preparasset, reverendissimus dominus Thomas, cardinalis Strigoniensis ipsum oratorem anno presenti turbavit et impedivit indebite et iniuste, omnes abbates sub sua iurisdictione constitutos in prefato regno potiores prohibendo ab ingressu ipsius generalis capituli secrete et de facto. Supplicat igitur sanctitati vestre orator prefatus, dignetur committere et mandare aliquibus probis viris in partibus et eorum cuilibet, ut causam et causas, quam et quas idem orator movere vult et intendit contra prefatum dominum Thomam cardinalem omnesque alios et singulos sua communiter vel divisim interesse putando de et super impedimentis, turbationibus et molestationibus huiusmodi et iure capitulum generale dicti Ordinis convocandi et alia premissa et cetera circa ea necessaria faciendi rebusque aliis in actis exprimendi audiant, cognoscant neque debito terminent et decidant tam coniunctim quam divisim ac summarie etc. cum dependendis, emergendis, incidendis et connexis ac potestate citandi eciam per edictum constito summarie et extra iudicialiter de non tuto accessu, nec non simili sine eodem edicto etiam sub censuris inhibendis quotiens sibi videbitur, ceteraque in premissis necessaria et oportuna faciendi, non obstantibus constitutionibus et ordinationibus apostolicis ceterisque in contrarium facientibus quibuscunque.||
Concessum ut petitur in presentia domini nostri pape.||
L(eonardus) cardinalis Sancti Petri ad vincula.||
Et cum absolutione a censuris, si quibus etc: ad effectum presentium. Et cum derogatione constitutionibus Bonifacii de una et concilii generalis de duabus dietis, dummodo non ultra tres. Et per breve sanctitatis vestre hac supplicatione introclusa. Concessum L(eonardus) cardinalis Sancti Petri ad vincula. Datum Rome apud Sanctum Petrum nonis Septembribus anno octavo.