Leo episcopus, servus servorum Dei, venerabili fratri episcopo Iauriensi salutem et apostolicam benedictionem. Ex parte Mathei abbatis monasterii Sancti Martini de Sacro Monte Panonie (!) ordinis Sancti Benedicti Iauriensis diocesis et Iohannis Tandallo monachi ac conventus dicti monasterii nuper propositum fuit coram nobis, quod alias venerabilis frater noster Iohannes episcopus Calipolensis senio confectus, qui tunc monasterium Sancti Aniani confessoris castri de Ticonio dicti ordinis eiusdem seu alterius diocesis ex concessione et dispensatione apostolica in commendam obtinebat, considerans, quod antequam alias ipse Iohannes episcopus monasterium predictum Sancti Aniani assecutus fuisset, certi laici illarum partium illud per plures annos indebite occupaverant ac fructus, redditus et proventus ex eo provenientes in suos usus converterant, ac quod Matheus abbas et conventus prefati, qui pro recuperatione ipsius monasterii Sancti Aniani apud tunc regem et regnicolas regni Ungarie pluries et diversis vicibus institerant, illud recuperare non potuerunt et cupiens, quod ipsi monasterio Sancti Aniani ne illud post eius obitum rursus per laicos occupari contingeret, de persona idonea procideretur, Matheo abbate et conventu prefatis, ad quos electio abbatis monasterii Sancti Aniani huiusmodi, dum pro tempore vacat, spectabat, ad id consentientibus, commende monasterii Sancti Aniani huiusmodi ad effectum, ut illi de persona dicti Iohannis Tandallo tunc archidiaconi ecclesie Iauriensis et nullius alterius provideretur, coram certis notario publico et testibus extra Romanam curiam cessit, mediantibus pactis conventionibus et aliis infrascriptis, videlicet||
(1) quod dictus IohannesTandallo et pro tempore existens abbas dicti monasterii Sancti Aniani eidem Iohanni episcopo summam centum florenorum in certis tunc expressis terminis annuatim ex fructibus dicti monasterii Sancti Aniani dare et solvere deberet et teneretur; ac in eventum, quo idem Iohannes Tandallo ante obitum ipsius Iohannis episcopi decederet ac ipsius Iohannis Tandallo in dicto monasterio Sancti Aniani successor eidem Iohanni episcopo pensionem annuam predictam persolvere recusaret sive negligeret, tunc et eo casu Matheus abbas et ipso Matheo abbate decedente eius in dicto monasterio Sancti Martini successor et conventus prefati ad solvendam eidem Iohanni episcopo pensionem predictam astricti forent et esse censerentur, non obstantibus quibuscunque literis, iuribus et privilegiis, a sede apostolica seu quocunque alio iudice ecclesiastico aut seculari in contrarium impetratis ac impetrandis;||
(2) quodque dicti Matheus abbas et conventus super huiusmodi pensione et obligatione ipsorum patentes eorum literas sub eorundem sigillo autentico eidem Iohanni episcopo ante omnia dare et dictus Ioliannes Tandallo super huiusmodi pensione literas apostolicas cum oportuna ipsius Iohannis episcopi desuper dispensatione propriis suis laboribus et expensis pro ipso Iohanne episcopo impetrare et expediri facere deberent et tenerentur;||
(3) ac illis eidem Iohanni episcopo presentatis, Matheus abbas et conventus prefati eundem Iohannem Tandallo in possessionem regiminis et administrationis dicti monasterii Sancti Aniani inducere tenerentur;||
(4) et si prefatum Iohannem episcopum medio tempore, antequam dicte litere assignationis, pensionis sibi presentarentur, decedere contingeret, tunc castellani, qui castrum prefatum in quo monasterium ipsum Sancti Aniani consistit, dicto Iohanni Tandallo ipsius monasterii Sancti Aniani corporalem possessionem et tenutam dare et assignare ac de omnibus proventibus et redditibus illius respondere tenerentur et quod dictus Iohannes episcopus eosdem castellanos ad iurandum de tradenda tunc possessione huiusmodi eidem Iohanni Tandallo cogere promitteret prout promisit; et successive Ludovicus alter eorundem castellanorum tunc ibidem existens iuramentum huiusmodi prestitit.||
Ac quod Matheus abbas, Georgius prior et certi illic tunc presentes ipsius monasterii Sancti Martini monachi tam propriis suis, quam totius conventus prefatorum nominibus ac Iohannes episcopus et Iohannes Tandallo prefati premissa omnia respective observare ac adimplere promittentes ad hoc in forma camere apostolice se obligarunt, prout in instrumento publico desuper confecto plenius dicitur contineri. Et deinde Iohannis episcopi cessione predicta ... admissa de persona dicti Iohannis Tandallo f[uit] tamen canonice dicto monasterio provisum.||
Cum autem, sicut eadem subiungebat propositio, pactiones, conventiones, iuramenta et alia premissa interveniente simoniaca pravitate processerunt et absque dispendio salutis eterne observari seu adimpleri non valeant; ac Iohannes Tandallo monachus a bone memorie Leonardo tituli Sancti Petri ad vincula presbytero cardinali, dum in humanis ageret, penitentiario nostro primo, et deinde dicto Leonardo cardinali et penitentiario vita functo, Matheus abbas et conventus prefati a dilecto filio nostro Laurentio tituli sanctorum quattuor coronatorum etiam presbytero cardinali, penitentiario nostro moderno, quasdam super eorum respective ab excommunicationis et quibusvis aliis sententiis, censuris et penis ecclesiasticis, quas propter premissa incurrerent, necnon a simonie labe et excessu huiusmodi absolutione eis impendenda ad venerabilem fratrem nostrum Albertum episcopum Sebastiensem in civitate Iauriensi seu dicta diocesi comorantem et dilectum filium abbatem monasterii de Beel O. S. B. Strigoniensis seu alterius diocesis literas respective impetrarunt et per illas eisdem Alberto episcopo et abbati commissum et mandatum fuerat, ut ipsi vel eorum alter eosdem Matheum abbatem, Georgium priorem, Iohannem Tandallo ac alios monachos et conventum dicti monasterii Sancti Martini ab excommunicationis et quibusvis aliis sententiis, censuris et penis ecclesiasticis, quas ipsi Matheus abbas, Georgius prior, Iohannes Tandallo ac alii monachi et conventus ipsius monasterii Sancti Martini propter premissa incurrerant, necnon a simonie labe et excessibus huiusmodi hac vice duntaxat in forma ecclesie consueta, iniuncta inde eis pro modo culpe penitentia salutari et aliis, que de iure forent iniungenda, absolverent; ipsis tamen ad tempus, prout eis expedire videretur, a suorum ordinum executione suspensis et demum suffragantibus eis meritis alioque canonico non obstante impedimento super irregularitate, per eos et eorum quemlibet etiam, quia sententiis huiusmodi ligati missas et alia divina, non tamen in contemptum clavium, celebraverant officia et alias se eisdem inmiscuerant contracta; quodque eisdem premissis non obstantibus, in eorum ordinibus etiam in altaris ministerio ministrare ac ipsi Matheus Sancti Martini et Iohannes Tandallo Sancti Aniani monasteria huiusmodi, dummodo tempore datarum litterarum penitentiariorum eorundem non fuisset in eis respective alicui ius quesitum, retinere libere et licite possent et valerent, dispensarent omnem inhabilitatis notam et infamie maculam ex premissis insurgentem circa eos penitus abolerent ac iuramenta per eos prestita predicta, quatenus opus esset, eis relaxarent, prout etiam in dictis litteris ipsorum cardinalium et penitentiariorum plenius dicitur contineri; pro parte eorundem Mathei abbatis, Georgii prioris, Iohannis Tandallo ac aliorum monachorum et conventus dicti monasterii Sancti Martini nobis fuit humiliter supplicatum, ut ipsos et eorum singulos ad pacta et conventiones huiusmodi tanquam simoniaca et devenire reprobata ad huiusmodi iuramentum seu iuramenta per eos premissorum occasione prestita et alia premissa observanda non teneri declarari mandare aliasque eis super his oportune providere de benignitate apostolica dignaremur.||
Quocirca fraternitati tue per apostolica scripta mandamus, quatenus si et postquam Albertus episcopus Sebastiensis et abbas monasterii de Beel ad Leonardi olim et Laurentii cardinalium et moderni penitentiariorum nostrorum predictorum litterarum huiusmodi executionem processerunt seu eorum alter processerit, vocatis Iohanne episcopo et aliis qui fuerunt evocandi et inquisita per te super premissis diligentius veritate, rem ipsam ita esse repereris, prout superius enarratur, pacta et conventiones predicta simonie labe continere ac Matheum abbatem, Georgium priorem, Iohannem Tandallo; ac alios monachos et conventum monasterii Sancti Martini huiusmodi ad illorum ac iuramentorum huiusmodi observantiam minime teneri, sed eos et eorum quemlibet ab eisdem pactis et conventionibus libere et licite discedere ac se ab implemento ipsorum iuramentorum abstinere potuisse et posse, auctoritate nostra enuncies et declares, prout iuxta casus huiusmodi successum fuerit de iure faciendum. Datum Rome apud Sanctum Petrum anno incarnationis dominice MDXX. Nonis Octobribus pontificatus nostri anno octavo. [1520. okt. 7.]