Nos conventus monasterii Sancti Egedii de Simigio memorie commendamus, quod nobilis Ladislaus Thakach de Kys-Egres onera et quelibet gravamina Mathei, Emerici, Georgii et Urbani filiorum ac puellarum Sophie et Marthe filiarum omniumque suorum proximorum et consanguineorum suorum in subscriptis super se assumendo coram nobis personaliter constitutus sponte et libere est confessus in hunc modum, quod ipse videns et rememiniscens paupertatem illam, in quam propter infertilitatem vinearum et plurimarum necessitatum suarum in presenti incurrisset, propter quam expedicionem et defensionem regni, quam ex deliberacione et mandato serenissimi principis domini et domini Lodovici, Dei gracia regis Hungarie et Bohemie etc. domini nostri graciosissiini et suorum consiliorum universi tam possessionati, quam sessionati nobiles totius regni generaliter sub nota perpetue infidelitatis et amissione capitum bonorumque ac porcionum in presenciarum personaliter ire vel alium loco sui mittere deberent, posset minime. Ob hoc se heredesque suos universos in tutelam et protectionem specialem reverendi domini Mathei abbatis et conventus monasterii Sancti Martini Sacri Montis Pannonie dedisset. Qui et alias, in plerisque suis necessitatibus pro semper subsidio affuissent et in presenciarum quoque in persona sua unum hominem idoneum et pro premissa defensione aptum pecuniis ecclesie eorundem mittere haberent; his et aliis racionabilibus ex causis totalem porcionem suam possessionariam in dicta possessione Kys-Egres in comitatu Simigiensi habitam simul cum cunctis suis utilitatibus et pertinenciis quibuslibet terris scilicet arabilibus cultis et incultis, agris, pratis, fenetis, campis; silvis, nemoribus, rubetis, montibus, vallibus, vineis vinearumque promontoriis et quarumlibet utilitatum integritatibus quovis nominis vocabulo vocitatis monasterio Sancti Martini predicto et per consequens abbati et conventui loci eiusdem dedisset irrevocabiliter tenendam, possidendam pariter et habendam tali condicione mediante, quod prefati abbas et conventus et successores sui prefatum Ladislaum Thakach heredesque et posteritates suos universas perpetuis semper futuris temporibus in reali pacifica possessione prefate porcionis ipsorum possessionarie instar predialium, ad curiam ipsorum Remethe-Udvar pertinencium et serviencium tenere et defendere teneantur. Heredibus postmodum et posteritatibus suis deficientibus eadem porcio sua possessionaria pure in prefatum monasterium Sancti Martini devolvatur eo facto, harum nostrarum vigore et testimonio literarum mediantibus. Datum feria sexta proxima ante festum Beati Elie prophete. Anno Domini MDXXI. [1521. júl. 19.]