Reverendis Dominis patribus meis, Matheo abbati Sancti Iacobi et priori ac conventui de Bela, nobis colendis.||
Reverende domine patresque mihi colendissimi! Post meam commendacionem. Nostis optime in quantis illa ecclesia versata est periculis et modo versatur. Nos libenter illi ecclesie providissemus de prolatis, modo honestis fieri potuisset condicionibus, semota eciam aliqua simonie pravitate; ob debita ipsius ecclesie plures eciam habere optassent et optant et fortasse in periculum ecclesie illius et nichilominus solucio in nos et super nos remansisset. Sicque Deo volente -- is bonus pater dominus Laurencius presbyter et commendatarius abbacie Abraam applicuit nos, qui et monachari voluisset et voluit, tandem placuit de illa ecclesia sibi provideri simulcum onere solucionis, ut par est, offerens se et sua Ordini et eciam acquirere pro redempcione et solucione debitorum. Inter alios omnes, quoquot novi pro illa ecclesia instare, visus est iste melior, propterea misimus ad paternitates vestras, ut illam ecclesiam sibi conferatis per nos hic sibi datam; itaque imprimis reverendum dominum Michaelem decretorum doctorem exolvat et nostras et huius conventus literas excipiat et nobis remittat habitumque ibidem Ordinis accipiat. Postquam hec perfecerit, mox locetur in abbatem illius ecclesie cum publicacione et convocacione omnium plebanorum et colonorum prestet iuramentum manu stipulata de obediencia Ordini et fidelitatem iuxta cartam hic sibi per nos datam. Sicque vos valere feliciter optamus. Ex Sancto Martino datum.||
Matheus abbas.