Nos, capitulum ecclesie Iauriensis, memorie commendamus per presentes, quod reverendus et religiosi fratres, Matheus abbas, Barnabas custos ac Georgius de Rada conventus monasterii Sancti Martini Sacri Montis Pannonie in ipsorum ac totius conventus monasterii eiusdem nominibus et personis ab una et egregius Stephanus de Hederwara partibus ab alia coram nobis personaliter constituti, sponte et libere confessi extiterunt in hunc modum: quod ipsi, matura inter sese deliberacione prehabita, in causa et causis dudum inter ipsos racione et pretextu certarum decimarum eidem egregio Stephano de Hederwara per eosdem reverendum et religiosos fratres Matheum abbatem et conventum Sancti Martini Sacri Montis Pannonie arendatarum, quorundam eciam aliorum negociorum et differenciarum emersis et suscitatis, ex composicione quorundam proborum hominum, pacem parcium zelancium, reverendi domini Alberti episcopi Sebastiensis ac commendatori maioris prepositure ecclesie nostre Iauriensis et venerabilis magistri Pauli de Labod, fratris et concanonici nostri et egregiorum Stephani Aczel de Kereki, Stephani Amade de Warkony, Nicolai Iosa de Sawl, Andre Chorom de Deweczer, Ambrosii Kolos de Pathona, Ladislai de Zentiwan et Iob de Koronczo in talem pacis ac concordie devenissent, imo devenerint unionem: quod ipse egregius Stephanus de Hederwara racione et pretextu solucionis pensionis illarum decimarum eidem arendatarum aliarumque differenciarum exinde, ut prefertur, emersarum secutarumque ad octavam Pasce proxime affuturam [1523. ápr. 12.] eidem reverendo domino Matheo abbati et conventui prefatis florenos ducentos et quinquaginta solvere obligaretur et in festo Beati Iohannis Baptiste proxime affuturo [1523. jún. 24.] solvere deberet florenos similiter ducentos et octoginta, positis tamen prius quibusdam inter partes predictas racionibus de et super certis quinquaginta florenis de predicta summa defalcandis, quos iidem dominus abbas et conventus ad racionem eiusdem egregii Stephani de Hederwara, tempore videlicet dicacionis et connumeracionis contribucionum regalium domino thezaurario dederant, hac condicione videlicet interposita, quod si egregius Stephanus de Hederwara in Wesprimiensi et Simigiensi et iidem dominus abbas ac conventus in bonis eorundem dominorum abbatis et conventus in Iauriensi et Posoniensi comitatibus existentibus habitis testibus fidedignis comprobare possint illos quinquaginta florenos pro se ipsis non levasse, et si idem egregius Stephanus in predictis locis contrarium probare posset, quod videlicet idem dominus abbas et conventus dictos quinquaginta florenos pro se ipsis levassent, tunc ex predicta summa illos quinquaginta florenos defalcarent. Item quod in festo Beati Martini episcopi proxime venturo [1523. nov. 11.] idem egregius Stephanus de Hederwara duodecim vasa vini Simigiensis in vasis videlicet Simigiensibus eisdem domino abbati et conventui dare obligaretur. Casu autem si premissa omnia et singula modo premisso idem Stephanus de eadem in predictis terminis solucioni statutis et prefixis aut aliquo eorundem terminorum aut non posset quoquomodo, ex tunc predicti dominus abbas et conventus solum vigore presencium literarum nostrarum in dominium et proprietatem duarum possessionum, porcionum videlicet possessionariarum eiusdem egregii Stephani de eadem in possessionibus Dwnazegh et Etthewen vocitatis, in comitatu Iauriensi existentibus habitarum, cum omnibus utilitatibus et pertinenciis quibuslibet, telonio videlicet, censibus et generaliter quarumlibet utilitatum integritatibus quovis nominis vocabulo vocitatis sese intromittere et statuifacere possint et valeant et tamdiu possidere, donec modo premisso eisdem satisfactum fuerit pleno cum effectu. Ad que omnia premissa et quevis premissorum per se partes prefate coram nobis spontanea sese obligarunt voluntate inviolabiliter in forma compromissi observanda harum nostrarum vigore et testimonio literarum mediante. Datum feria quinta proxima post dominicam Iudica, anno Domini MDXXIII. [1523. márc. 26.]