Laurencius palatinus et comes Symigiensis universis Christi fidelibus, presencium noticiam habituris, salutem in Domino sempiternam. Ad universitatis vestre noticiam tenore presencium volumus pervenire, quod dominus noster rex percepta et considerata magna et inutili multitudine iobagionum monasterii sui de Thykon, de quorum numerositate idem monasterium parvam seu nullam utilitatem reportabat, advocatis ad presenciam suam tam abbate et conventu quam universis iobagionibus predicti monasterii, nobis tunc in curia sua existentibus dedit sue vive vocis oraculo in mandatis, ut exceptis seu relictis quibusdam paucis ex eisdem iobagionibus, scilicet numero duodecim, qui in iobagionatu et officio equestri secundum morem anticum relinquerentur, ceteros omnes in condicionarios populos redigere deberemus. Cum igitur hoc regium preceptum coram abbate et quibusdam monacis pro conventu comparentibus eisdem iobagionibus exposuissemus, ipsi iidem iobagiones a nobis et per nos a domino rege suppliciter pecierunt, ut ne ad popularia et condicionaria servicia ignominiose redigerentur, aliquam pocius summam pecunie pro servicio debito domino suo abbati solverent annuatim, ad quorum preces mediantibus nobis dominus rex inclinatus ordinavit et statuit, ut exceptis -- sicut prememoravimus -- personis duodecim, qui super sua libertate seu excepcione domini regis et nostras habent litteras, omnes reliqui tam nunc existentes, quam qui ab eorum successione des(c)enderint in perpetuum, per singulas mansiones singulis annis dimidium fertonem domino suo abbati solvant in duobus terminis infrascriptis, videlicet tria pondera in festo Sancti Georgii et iterum tria pondera in festo Beati Martini subsequenti, solucionem hanc apud ipsum Thykoniensem monasterium facientes. Hoc eciam adicimus, quod dominus rex hanc cum eisdem iobagionibus fecit graciam ampliorem, quod racione huiusmodi prenominate solucionis libertati ipsorum nequaquam preiudicium generetur, quin et iobagionum nomine censeantur et exercituales ipsius domini regis sint, sicut actenus extiterunt. In huius itaque ordinacionis memoriam et perpetuam firmitatem presenies concessimus litteras sigilli nostri munimine roboratas. Datum in villa Koyar in festo Beati Nicholai anno Domini Mo CCo LXo septimo. [1267. dec. 6.]