Excellentissimo principi domino Ladizlauo, Dei gracia inclito regi Hungarie, Dalmacie, Croacie, Rame, Seruie, Gallicie, Lodomerie Cumanieque, capitulum Vesprimiensis ecclesie oracionum sufragia devotarum. Vestra noverit celsitudo, quod nos sumpma cum obediencia, qua decuit, receptis litteris vestris pro viro religioso fratre Andrea, abbate ecclesie de Tychon, et iuxta earundem continenciam unacum comite Andrea de Symigio, homine vestro, nostrum hominem idoneum, magistrum Nicolaum socium et concanonicum nostrum, ad infrascriptas metarum reambulacionem et statucionem faciendas pro nostro testimonio duxissemus destinandum. Tandem iidem ad nos reversi nobis una voce retulerunt, quod ipsi feria secunda proxima ante festum Beati Iacobi apostoli [1275. júl. 22.] ad facies possessionum Gamas vocatarum, in comitatu Symigiensi prope lacum Balatin habitarum, vicinis et cometaneis earum universis legitime illic convocatis et presentibus accessissent, quas per veras earum metas hoc ordine reambulassent:||
Quod primo incepissent in dicto lacu Balatini et exinde paulisper versus occidentem tendendo venissent ad sanctuarium ecclesie Sancti Clementis, inde directe versus orientem ad vallem arundinosam, abhinc flexive per arundineta in bono spacio versus meridiem eundo ad viam pervenissent, in qua iuxta possessionem Pentekhel ad publicam viam attigissent, in qua parvum procedendo venissent ad quasdam metas terreas bene aparentes. In eadem via per magnum spacium ascendendo tres metas terreas bene aparentes comperissent. Inde ad parvam vallem, dehinc in minori via versus occidentem flectendo, ad rubetum ascendendo et in eadem procedendo, tandem per bonum spacium descendendo ad quandam vallem, prope villam Baclar dicte ecclesie Tykoniensis habitam, pervenissent et in eadem valle versus aquilonem eundo ad predictum lacum Balatini attigissent. Et sic per veras earum metas antiquas et cursus metales procedendo reambulassent, ut prefertur, metas prenominatarum possessionum Gamas vocatarum dicte ecclesie de Tyhon, prout dictus abbas ac sui predecessores abbates easdem nomine dicte ecclesie actenus usi fuissent et extitissent, statuissentque easdem ecclesie prenominate et per eam ipsi domino fratri Andree abbati ac suis successoribus perpetuo possidendas, nullo contradictore penitus inibi existente.||
Ut igitur presens scriptum robur obtineat perpetue firmitatis, presentes concessimus litteras nostras pendentis et autentici sigilli nostri munimine roboratas. Datum octavo die termini prenotati, anno gracie Mo CCo LXXo quinto, [1275. júl. 29.] reverendo in Christo patre et domino nostro Paulo episcopo, magistro Fauo preposito, Paulo cantore, Rugas custode existentibus.