Religiosis viris, conventui [ecclesie S]ymigiensis comes Stephanus Bubek, iudex curie domini Lodouici, Dei gracia [regis] Hungarie, amiciciam paratam cum honore. Noveritis, quod religiosus vir frater Iohannes, abbas ecclesie Tyconiensis [iuxta continenciam] priorum litterarum nostrarum dilatoriarum in octavis festi Omnium Sanctorum [1360. nov. 8.] in figura nostri iudicii personaliter comparendo contra honorabile capitulum [ecclesie Wesprim]iensis proposuit eo modo, quod ipsum capitulum in concambium possessionariarum porcionum dicte ecclesie Tyconiensis, in possessionibus Z[eleus et Gely]mer vocatis habitarum, in comitatu Wesprimiensi existencium, quasdam possessionarias porciones, in possessionibus Arach, Ozoufew, [Eurmenes] et Oduary vocatis, in comitatu Zaladiensi adiacentes, mediantibus eorum litteris presentibus dicte sue ecclesie Tyconiensi [ac abbati, tunc] in eadem ecclesia existenti, perpetuo et irrevocabiliter contulissent (!); et licet ipse ac dicta sua ecclesia in dominio dictarum [possessionariarum] porcionum, in possessionibus Ozufeu, Eurmenes et Oduory vocatis habitarum, existant, tamen porcio possessionaria, in d[icta possessione] Arach existens, nunc apud manus dicti capituli ecclesie Wesprimiensis occupative haberetur, quam rehabere v[ellet iure] mediante a capitulo prenotato, et ibidem quibusdam litteris privilegialibus eiusdem capituli ecclesie Wesprimiensis, [in anno Domini] millesimo CCCmo XXXmo septimo [1337.] emanatis, dictas possessionarias porciones, in predictis possessionibus Arach, O[zoufeu, Eur]menes et Oduary vocatis habitas, per ipsum capitulum dicte sue ecclesie in concambium seu permutacionem possess[ionariarum porcionum] dicte sue ecclesie Tyconiensis, in predictis possessionibus Zeleus et Gelymer vocatis habitarum, traditas extitisse e[videnter comprobaret]. Quo percepto dominus Petrus decanus ecclesie Wesprimiensis pro ipso capitulo Wesprimiensi cum procuratoriis litteris eiusdem [ex adverso] respondit eo modo, quod predicta possessionaria porcio, in dicta possessione Arach vocata habita, apud ipsum capitulum [non habere]tur nec eandem occupasset capitulum annotatum.||
Unde, quia predictus dominus frater Iohannes, ecclesie Tyconiensis abbas, ipsam possessionariam porcionem, in dicta possessione [Arach habitam], simul cum predictis aliis porcionibus possessionariis per ipsum capitulum modo prehabito dicte sue ecclesie Tyconiensi [concambia]liter datam extitisse vigore premissi privilegii dicti capituli ecclesie Wesprimiensis declarando occupative erga manus ipsius [capituli habere] proponebat; prescriptusque dominus Petrus decanus, procurator ipsius capituli legitimus, dictam possessionariam [porcionem, in] predicta possessione Arach habitam, erga ipsum capitulum non [bene] affirmabat; et ex eo homo regius sub vestro testimonio [ad ipsius possessionarie] porcionis, in dicta possessione [Arach habite] ipsi ecclesie Tyconiensi statucionem faciendam transmittendus [vide]batur; idcirco vestre religionis amiciciam presentibus petimus diligenter, quatenus vestrum mittatis hominem pro testimonio fide dignum, quo presente Deseu, filius Pauli de ... vel Nicolaus aut Michael, filii Demetrii de Zeuleus aliis [absentibus] homo regius in octavis festi Epiphanie Domini nunc venturis [1361. jan. 13.] accedat ad faciem libate possessionarie porcionis, [in dicta possessione] Arach vocata habite, in comitatu [Zaladiensi existen]tis, vicinorum et commetaneorum suorum legitimis convocacionibus habitis [ipsisque partibus] vel earum legitimis procuratoribus presentibus, facta prius legitima reambulacione et ab aliorum porcionibus distinccione eiusdem, [statuat] ipse eandem ipsi domino Iohanni abbati ecclesie Tyconiensis et sue ecclesie eo iure, quo sibi dignoscitur [pertinere, perpetuo] possidendam, contradiccione ipsius capituli ecclesie Wesprimiensis non obstante, si per alios non fuerit contradictum; contradictores vero, alii si qui fuerint, contra eundem dominum fratrem Iohannem abbatem in regiam citet presenciam ad octavas diei Cinerum nunc venturas [1361. febr. 17.] racionem contradiccionis eorum reddituros. Et post hec ipsius possessionarie reambulacionis et statucionis seriem, ut fuerit opportunum, cum nominibus contrad[ictorum] et citatorum, si qui fuerint, ad dictas octavas diei Cinerum domino nostro regii (!) fideliter rescribatis maiestati. Datum in Wissegrad, octavo die termini prenotati, anno Domini Mmo CCCmo LXmo. [1360. nov. 15.]