Ich Georg von Ruckhendorf bekhen für mich und all mein erben und thue khundt öffentlich mit dem brüef allen leüdten, gegenwerrtigen unnd khunftigen, als mier und meinen erben der ehrwierttig herr brueder Johannes, abbt des gottshaus zu sant Mariazell, und der convent gmain daselbs verkhauft und ubergeben haben ain prandtstatt gelegen zu Khaunberg zu nächst der währ und der landtstrass und ain pewndt daselbs zu nächst dem haus, das die zeüt Hanns der Schamberger hat innen gehabt, in solicher mainung, das ich, mein erben oder alle die, die dieselben prandtstadt und peundt fürbas nach mier innen haben und besizen, in und ieren nachkhomben zu dem vorgenanten ihrem gottshaus järlich an sant Michaels tag davon raichen und dienen sollen sechzehen Wienner pfening der schwarzen münts und nicht mehr. Auch soll ich, obgenandter Georg von Ruckhendorf, und mein erben der egenanden prantstadt und peundt rechter grundtherr, Stifter und steurer sein. Mit urkhundt des briefs besiglt mit meinem anhangundem insigl; und der sach ist durch meiner vleissiger gebet willen gezeug der edl Ulrich der Eibensprunner, mein pfleger zu Ahrnberch, mit seinem anhangundem insigl, im und seinen erben ohn schaden. Geben zu Wienn am freytag nach sant Gallen tag, nach Christy gebuerth vierzehen hundert und in dem neünundzwainzisten jähre.

Source Fulltext: Herold