In nomine sancte et individue trinitatis. Wolfkerus dei gratia patauiensis ecclesie episcopus vniversis christi fidelibus perpetuam in christo salutem. Notum fieri volumus omnibus presentis et futuri temporis filiis (sic), qualiter lis inter canonicos regulares Sancti Nycolai et inter dominum Ortolfum et fratres suos Ottonem et Sibotonem de Tegerenbach versabatur pro decimis agriculture sue in barrochia Griezkirchen et quodam predio, quod tegerenbach vocatur, quod Ortolfus pater eorum pro remedio anime sue beato Nicolao et canonicis deo ibi seruientibus contulerat, nostro est decisa iudicio. Constitutis in presentia partibus causa a predictis canonicis est proposita, super qua et super prenominatorum fratrum responsis quesitum est a nobis in sententia, quid de hiis ad conmodum utriusque partis iustum uideretur. Super quo requisiti a nobis dominus Chvnradus archidiaconus et Thiemo de bwchenperg ministerialis noster talem dederunt sententiam, vt testes audirentur et secundum eorum attestationes iuxta tenorem priuilegii, quod iam dicti canonici pro se allegabant, cause finem inponeremus. Dietmarus igitur de crammerstain iuratus dixit, eandem causam ita notam esse sibi, sicut tenor priuilegii habebat. Wizmannus etiam iuratus dixit, bene sibi constare de causa et ita esse, vt ex tenore priuilegii audierat. Auditis itaque eorum attestationibus requisiti a nobis dominus Chalhohus archidiaconus et Heinricus de prez ministerialis noster hanc sententiam dictauerunt, quod prenominati testes ita testificati essent, quod sepedicti canonici iuste per eos pretaxatam decimam et predium supra memoratum obtinuissent. Quam sententiam rite latam et vniversaliter a clericis et laicis approbatam potestatis nostre auctoritate confirmantes Sigilli nostri robur ei inpendimus et si qui eos in predicta decima et predio iam sepius nominato grauare aut eos iniuriari presumpserint, auctoritate beatorum apostolorum petri et pauli eorumque successorum et nostra anathematis uinculo eos innodamus. Acta sunt hec patauie in publico capitulo nostro sub testibus subnotatis. Poppone abbate de Altha, Leonhardo preposito de Richersperc, Dietmaro preposito de Suben, Gerungo preposito de Osterhoven et canonicis cathetralibus Chvnrado archidiacono; Chalhogo archidiacono, Hainrico plebano de Wartperc, Haeinrico plebano de Gozpoldeshouen, Alberone de Trivsteren, Pilgrimo de sancto Egidio, Vlrico de Ammezdorp, Leone de Griezkirchen, Waltchuno de Rothenperc et fratre suo Alrammo de Vthendorpc, Wergando de Romthingen, Hainrico de Povmgarthen, Alkero et Hainrico fratre suo de Waltecke, Wernhardo de Ort, Thiemone de bwchenperc, Alberto puero, Hainrico de Prez, Hainrico de Loenstorf, Ekkehardo de vwrt, Alberone de Germunsperc, Dietmaro et fratre suo Haeinrico de crammerstain, Alberto, Sigbothone, Walthero, Rvizone, Wizmanno, Azelino, Pernoldo.

Source Fulltext: OÖUB 2 (Wien 1856), S. 470-471