(Chrismon.) In nomine sanctae et indiuiduae trinitatis. Fridericus Secundus diuina fauente clementia Romanorum rex et semper augustus et rex Sycilie. Uotis fidelium nostrorum, presertim que ad manifestos Ecclesiarum usus cedere videntur, de consueta regiae serenitatis munificentia pium semper fauorem uolentes impendere presentis Scripti certitudine ad notitiam presentis eui atque ad memoriam futurae posteritatis uolumus uenire, quod ad instantiam et obnixas preces dilecti principis fidelis nostri Volrici Pattauiensis episcopi, quem in obsequiis Imperii et nostris iam dudum non tantummodo inuenimus deuotum, verum etiam in suae fidelitatis feruore credimus, immo non dubitamus constantem inantea permansurum, ad recognitionem laudabilium meritorum suorum quoddam feudum, quod de concambio antiquitus inter Imperium et Cathedralem Ecclesiam Pattauiensem de Regali tunc Caenobio sanctimonialium Intemeratae virginis dei genitricis MARIae facto tunc cessit Imperio, quod feudum vexilli, vulgo Uanlehen appellatum illustris quondam 0. dux Bawarie ab Imperio dinoscitur assecutus, hoc idem feodum Dilectus consanguineus et fidelis noster Lodwicus illustris Palatinus comes Reni et dux Bawarie ad preces nostras in manus regie celsitudinis uoluntarie resignauit nosque illud in continenti prelibato VI. pattauiensi Episcopo et suae ecclesiae liberaliter dignati fuimus conferre et confirmare. Ipse autem Episcopus sollicite procurans ecclesiae sue utilitatem, ipsum feodum statim titulo legalis successionis contulit praenominato duci bawarie ab ipso Episcopo suisque successoribus, non ab Imperio ratione feodi de cetero recipiendum et possidendum. Ut itaque hec apud posteros inconuulsa permaneant et perpeti (perpetim) firmitudine obseruentur, hoc priuilegium ob dilectionis euidentiam memorato Episcopo suaeque Ecclesiae indulsimus Sigillo aureo maiestatis nostrae roboratum. Huius etiam testes sunt Sifridus sanctae Moguntine sedis Archiepiscopus, Ekkebertus babenbergensis, Sifridus Augustensis, Hainricus Basiliensis Episcopi, Liupoldus dux Austrie et Styrie, Bernhardus dux Karinthiae, Otto dux Meranie, Hainricus nobilis de niffen, Anselmus de Justingen Marescalcus imperii, Waltherus de Sipf (Scipf) pincerna, Dieto Camerarius, Philippus de bonlandia, Hademarus de Wesint, Hainricus de Lonsdorf, Waltherus de Tannenberch, Otto de morsbach et alii quam plures. Signum Domini nostri Friderici Inuictissimi Romanorum Regis et (Monogramma) Semper Augusti et Gloriosi Regis Syciliae. Ego Chuonradus Metensis et Spirensis episcopus Imperialis aule Cancellarius vice domini Sifridi Moguntinae sedis Archiepiscopi; totius Germanie Archicancellarii recognoui. Acta sunt hec Anno domini Millesimo ducentesimo XVII. Regnante domino FREDERICO secundo diuina fauente clementia Romanorum Rege et semper Augusto et glorioso Rege Sycilie, Anno Romani Regni ipsius Quinto, Sicilie uero XVIII. Datum in sollempni Curia Apud Nuoremberch Anno pretaxato XII. Kalend. Febr. Quintae Indictionis.

Source Fulltext: OÖUB 2 (Wien 1856), S. 586-587