Ich Otte von Haslowe vnd ich Chadolt di zwen prueder wir tu^en chunt allen den, di nv sint vnd her nach chunftich werdent, daz wir habn globt hern vlrichen von Merchenstain vnd seiner Hovsvrowen vro°n Geyseln vmb den zehent datz Menfritstorf, daz wir in den bestetigen suln also mit beschaidener red, daz in vnsers prueder chind hern Hainrichs von Haslowe ouf geben suln vor vnserm herren dem hertzogen von O^esterrich vnd daz er in gelihen werd, vnd swo in daz nicht glaist wu^erd, da setz wir in fuer ze Ebenteuer daz Regelnprunne vnsers aigen gu^ets zehen phunt gelts, das si dar ouf habn so Lange, vntz daz wir in daz vor gnant glub laisten. daz dise red stet bleib, des geb wir in disen prief ze v°rchund mit vnsern Insigeln bestetigt vnd mit disen gizeugen, di her nach geschriben sint, Daz ist her Stephan von Meyssowe, her vlrich von Chappelle, her Chunrat von potendorf, her albrecht der Stuchs, her Otte von Celkinge mit sinem insigel, her Marguart vnd her Otte di prueder baid von dem Hevslein vnd ander piderb Leut, den disev sache chund vnd gewizzen ist. Diser prief ist gegeben des Jars, da von Christes gibu^ert was in dem dreitzehentisten Hundert Jar an vnser vrowen tag in der vasten Datz wienne.

Source Fulltext: OÖUB 4 (Wien 1867), S. 336, Nr. 361