Ich Otachar Piber von Piberstein vergiche mit sant minen chinden Heinrichen vnd Rv^egern vnd Vlrichen vnd Friderichen vnd Sygharten an disem prief allen den, di in sehent vnd horent lesen, di nv sint oder noch chvnftig werdent, Daz ich mit gu^etlichem willen vnd mit willen miner chinde, di hie benant sint, hern Gvndackern von Storchenberch gege\eben han zwei gu^et, div mein reht aygen gewesen sint dacz Haemperige vnd dacz Topel, div der Tvngozzinger ze Lincz von mir ze rehtem lehen hat gehabt, disev zwei gut han ich im hern Gvndackern gegeben für wernharten von Messenpach vmbe ein widerbechsel so, daz ich noch dehein mein chint fürbaz deheinen chriek dar nach iht haben sullen. waere aber daz, daz im dehein mve oder dehein chriek ovf disen gu°ten oder von diesen gu°ten ovf gest\ende, swelihen schaden er des naem, den sol er haben ouf alle dev vnd ich vnd miner chint in dem lande habent sin. vnd daz daz alles staet belibe vnd vnverchert von mir vnd von minen chinden vnd von aller vnser nachkvnft, dar vber gibe ich im hern Gvndachern vnd sinen chinden vnd aller siner nahkvnft disen prief versigelten mit minem Insigel vnd mit hern Heinrichs Insigel von volchenstorf vnd meins Ohaims wernharcz Insigel von Messenpach zv einem vrchu^ende mit den zivgen, di da pei gewesen sint: Her Heinrich von volchenstorf, Her Chvnrat von Chapelle, Her Otacher von Lobenstein, Peter sin pru°der, Alber von Fu°rt, Heinrich von Innerse, Ortolf vnd Friderich von Tanpach vnd ander vil, di da pei waren. Daz ist geschehen, do von Christes gepurde waren Tousent Jar, Drev Hvndert Jar, darnach in dem Nev°mten jar an sand mathevs tak ze wilperch in dem hovse.

Source Fulltext: OÖUB 5 (Wien 1868), S. 28-29, Nr. 24