Ich Syghart von Greymenstain tuen chunt vnd vergich an disem prief allen den, di in sehent oder horent lesen, daz ich mit meiner hausvrowen ver Marigareten guetem willen vnd aller meiner chinde han ze chauffen gegeben Dietrichen dem penesch mein aigenschaft an des Graspechen lehen, dev ich gechauffet vnd auz gewechselt het von meinen Ohaim Otten von Ottersteten mit dem lehen dacz dem Cheslehen vnd mit anderem meinem guet, daz er gern nam fur di vorgenanten aigenschaft. Dar vber gib ich im ze einer dest pezzern bestetigung fur all ansprach vnd fur allen chrieg auf der oftgenanten aigenschaft sechzig pfunt pfenning wienner munzze ze rechter satzvng. Daz di red stet beleibe vnd vnzebrochen, dar vber gib ich im disen brief ze einem vrchunde mit meinem hangunden jnsigel. der red sint gezevg her Chalhoch von pernowe, peter der piber, Rueger der piber, Orlof der piber, Chunrat der hauser, penesch von Lo^ezperch, Buzke vnd Bohonik von Harach, Syghart vnd Ortel von Waltpurch, Chwnrat der Semleinzmenel, Marchart der widmer vnd ander piderb levt genueg. Der prief ist gegeben, do von Gotes gepurd waren Tausent jar, drev hundert jar, Darnach in dem Nevnten jar an Sant Mychels tag.

Source Fulltext: OÖUB 5 (Wien 1868), S. 29-30, Nr. 25