Ich Erchenger von wesen vergich vnd tuen chunt an disem prief allen den, di in sechent oder ho^eren lesen, di nu sint oder hernach chumftig werden, daz ich mit wolbedachtem muet vnd mit zeitigem rat meiner vrevnt vnd auch meiner levt mein Haus datz wesen gemächt vnd gegeben han ledichleichen meinem Oehaim Hadmaren von waldekk vnd di guet, di hie an dem brief geschriben stent. Daz ist der hof, der do leit vor dem haus datz wesen vnd haizzet an dem Mairhof, vnd daz Puerglechen vnd zwai guet ze vaerichech vnd daz guet datz Speting vnd aeins datz Chager vnd di guet datz Sikking vnd aeines datz wesen uerfar, do der Schechel auf sitzzet, vnd auch daz verfar, do Eberwein auf sizzet datz wesen verfar vnd auch die Edeln leut halb vnd auch di Paewleut halbe vnd allev Holtz halb vnd alle va^erst halb vnd allez wismat halbs, swaz zu vnser paider tail hat gehoert versuechtez vnd vnuersuechtz mit so getaner beschaidenhait, ob ich sturbe vnd nicht chinde gewunne bei meiner Hausvrowen vron Agnesen Hern Chunn Ta^echtter von waldekk, ez wem sun oder To^echtter, so schol der vorgenant Hadmar von Waldekk mein Oehaim meiner vorgenanten Hausvroewen vron Agnesen geben vier hundert pfunt Pazzawer pfenninge iner Jars vrist nach meinem tod vnd schol si da mit schaffen ledichleichen irn vrum an allen irrsal, swi si wil. wer aber daz, daz mein Oehaim Hadmar von waldekk der vorgenant meiner Hausvro^ewen Agnesen der vorgenanten ir Pfenning nicht guetleichen vnd liebleichen wolt geben in der jarsvrist, als hie vor beschaiden vnd verschriben ist, so hat di oft genant vrowe ver Agnes vollen gewalt ze versezzen daz vorgenant Haus datz wesen vnd di vorgenanten guet vnd di Edeln leut vnd di Paewleut vnd di Holtz vnd di vaerst vnd auch daz wismat, alz hie vorgeschriben stet, vmb di selben vier hundert pfunt pfenning Pazzawer swem si wil, vnd schol dann mein Oehaim Hadmar von Waldekk der egenant gantzen gewalt haben von den selben ze losen vmb di selben pfenning alle jar an vnser vroewen tag ze der Liecht Mezse daz selb Havs ze wesen vnd di gvet vnd Edeln leut vnd di Paweleut vnd di Holtz vnd di vaerst vnd daz wismat, dem sis gesetzet hat. vnd daz diser gewerft vnd disen sach meinem oftgenantem Oehaim Hadmarn von waldekk furbaz also stet vnd vnzebrochen beleib, gib ich im disen prief zu einem verchunde versigelten mit meinem Insigel vnd mit den zevgen, di man hie benennet: Her Seyfrid von vroewenhofen, Her Hainreich von Preisinge, Her Ortolf von Marspach, Her Alram von Rottawe, Her Chalchoch von valchenstain, Her Ortneid von Tannenberch, Her Chuenrat von valchenstain vnd ander piderb leut, die da bei warn. Diser prief ist gegeben datz wesen, da von Christes gepuerd waren Tavsent jar, drev hvndert jar, in dem zehenten Jar an sant Margreten tag.

Source Fulltext: OÖUB 5 (Wien 1868), S. 37-38, Nr. 35