ICH Peter von Ebergozzing vnd ich Ofmey sein hausvrawe vnd alle vnser Erben vergehen vnd tuen chunt Allen den, di disen brief an sehent vnd horent lesen, die nv lebent vnd hernach chunfttich sint, daz wir mit veraintem rate vnd ze der zeit, da wir ez wol getuen mochten, verchauft haben Die manschaft, Die Otte der Mitterpech vnd sein hausvrawe ver Chunegunt von vnz gehabt habent, hern Stephan von Hochenberch vnd seiner hausvrawen vern Chunegunt vnd allen seinen Erben Drev phunt Geltes vnd ligent dev in dem Newen walde vnd vmbe der Golsen, vmb zwelif phunt wienner phennige, der wir schon gewert sein, vnd suln dez selben Gutes ir scherm sein, als recht ist in dem lande, vu^er alle ansprach dez vor genanten hern Stephans vnd seiner hausvrawen vnd irer Erben vnd sol auch daz haben auf alle dev vnd wir in dem lande haben ze Osterich, swo daz leit Daz dev rede stet beleibe, dor vber gib ich im disen brief versigelt mit meinem insigel vnd sint des Geziug Her Otte von Celkinge, her weichart der Toppler, her weichart von Ralenstain (?), Her ditreich von weizzenberch, her Otte sein bruder vnd ander frum loute genuge. Diser brief ist gegeben ze hochnberch. Da von Christes Geburt waren Tausent iar Drev hundert iar, in dem zweliften iar dar nach an dem Pericht tag.

Source Fulltext: OÖUB 5 (Wien 1868), S. 67, Nr. 64