Ich Gvndacker von Storchemberch vergiche an disem prief allen den, di in sehent vnd horent lesen, di nv sint oder noch chv^enftik werdent, Daz her Chvnrat der Charigel er vnd sin pruder Gerunch vnd vlreich, Stevphan vnd Perchtolt von mier ze rehtem Lehen habent zwai Lehen in dem Dorfe dacz Ho^enestorf mit allein dem reht vnd mit aller der staet, vnd reht lehen reht hat vnd ovh also, waer, daz hern Chvnracz Hovsfrowe frov Angnes in hern Chvnraten vber lebt, so sol si disev vor benanten zwai Lehen haben vncz an ier tot, so daz si dev nindert vertvn noch verchvmbern sol mit deheiner slaht wandlung, vnd nach ier tot der vor verschriben frowen sullen di vor benanten Charigel disev Lehen von minen genaden vnd miner hant fürbaz an allen chriek haben, als vor verschriben ist, vnd daz die wandlung also staet belibe vnd vnd (sic) vnuerchert, dar vber gibe ich in den Chariglein, di vor benant sint, disen prief versigelten mit minem hangundem jnsigel zv einem vrchu^ende vnd mit den zevgen, den diz sache wol bechant ist: Her Chvnrat von Lv°tinberch, jans von Jvngling, Friderich von Hannowe, Albreht von Fu°rt, Ortolf vnd Friderich pede Tanpechen, Ditmar von Chvnzing vnd ander vil, di da pei waren, Dicz ist geschehen, do von Christes gepurde ergangen waren Drevzehenhvndert jar, dar nach in dem Drevzehndem jar nach sande Merteins tak an dem ohtem tak ze Lyncz in der Stat.

Source Fulltext: OÖUB 5 (Wien 1868), S. 119, Nr. 118