Nos Petrus de Rosenberg summus Regni Boemioe Camerarius ad Universorum tam Praesentium quam futurorum notitiam cupimus devenire in palam profitentes, quod cum ingenuo viro amico nobis specialissimo Domino Joanni de Capella sinceritatis et amicitiae unionem affectuose inivimus tali forma seu modo promittentes eundem sine fraude jurare (sie, iuuare) contra omnes homines omnemque Personam, cuiuscunque conditionis fuerit rebus pariter et personis excepto Domino nostro Rege Boemiae, qui pro tempore extiterit, cui fidei nostrae, debitum praestabimus, ut tenemur, si vero Dux Austriae, quicunque in terra fuerit constitutus, Dominum Johannem niteret destruere ad ipsius ad nihilationem vellet cogitare, Tunc nos eidem Domino Johanni assistemus et sic contra eundem ducem cooperabimur fideliter toto nostro posse Semota omni difficultate seu occasione. ad haec siquis amicorum nostrorum seu horum, qui nobis literis sunt Confoederati, erga Dominum Johannem de Capella faciet vel excedet quoquomodo, ex tunc nos contra ponere debemus, qnod talis excessus ad nostra consilia dirigatur et quod ipsi Domino Joanni fiat laudabilis recompensa. sin autem talis amicus vel quicumque fuerit ex utraque parte et memoratus Dominus Johannes ex parte altera, nostrae ordinationi et consilio nollet consentire, tunc nos non minus ipsum Dominum Johannem non deseremus, sed ei contra eundem suffragabimur manu vallida et potenti. In cujus rei testimonium praesentes litteras conscribi fecimus et sigilli nostri majoris robore conmuniri. datum in Crumbnau Anno Domini 1316, in die S. Laurentii Martiris.

Source Fulltext: OÖUB 5 (Wien 1868), S. 172-173, Nr. 173