Ich Benedit Chadoltin von Haichenpach vnd mein zwen zw°n v^ell vnd Rudel wir vergehen vnd thwn chvnt allen den, (die) disen prief sehent oder horent lesen, daz wir dar vm, datz zeidel vnser veter vns avf hot geben in vnser ohaim der valkenstainer Chahols vnd Cvnrats hant sein erbtail vnd sich dez verzigen hot, haben willicleichen vnd mit verdohtem mw°t vnd mit vnser vrevnt rot gelobt vnd gehaisen, daz wir noch chain vnser afterchvmft daz gothavs noch di prv^eder dazz dem Slag nimermer ansprechen schvllen noch mvgen vm chain aigen noch vm chain gwet, daz zi von vnsern vodern e gehabt haben oder noch haben, swoz lig oder swiz gehaisen zei, wan wir ze in chain reht haben vnd besvnder vm Horav vnd wantzaben, Glacing vnd Lichtenhec, vnd wan wir vns els vnsers rheten verzigen haben vnd an disem prief offenlichen verzeihen vnd aller ansprach gegen dem gothavs dazz dem Slag. woltn aber wir vber di red wrpaez wrzeihen, wir weren kinder vnd weren zv vnsern iarn nicht chomen, darvm haben vnser liben ohaim Chalhoch vnd Cvnrat di valkenstainer zv vns vnd wr vns gelubt noch vnser peth avf vnser trev vnd avf els vnser gwer vnd auf vnsers vetern zeidleins erb tail, den er vns geben vnd gezezcet hot in ir hant. vnd daz di gelub ewichleichen ganze vnd vnzcesprochen beleiben, dar vber geb wir dem vor gnatem gothavs den prief verinsigelt mit vnser vrevnt ingsigel Hern Chalhochs dez valkenstainer vnd Cvnrath dez valkenstainer, Hern Ortneizz dez Tanberger vnd Hern Pvrcharzz von vreiberch. Dez zint gezcevg Irmfrid der Clafpech, Pvrchart von valkenstain, Ott der Crotendorfer, walchvn von Reispach, Elbel von entan, Dietreich der Sreiber von Rennarigel, Symon von Rennarigel, Ott der Nimervol, Seibot der amman von der Chirchen vnd ander erwer levt. Der prief ist geben, do von Crist pwrt varen dreizcehen hvndert jar, in dem zezcehenten jar an sant Gervasi vnd Prothasi tag.

Source Fulltext: OÖUB 5 (Wien 1868), S. 168-169, Nr. 169