Ich Otakcher der Fverter von Schavmberch tven chvnt mit disem prief allen, di in horent lesen, daz di erberen herren her Vlreich der Probst, her Wolfhart der Techent vnt aller Convent datz sand Nykla pei Pazzaw habent mier vnd meiner havsfravn vren Reyhzen heren hertneides tohter von Liehtenwinchel ze leibgeding geben ir aigen datz Ekreichstorf, daz e der Hyerzpekch von in het avch ze leibgeding, vnd habent daz getan mit so getanen gelvben, daz ich vnd mein vor genant havsfrav, di weil wier paidev leben, schullen in da von dienen alle iar an sand Andres tag sehzig phenning nevwer wienner vnt swo wier den tag verzikchten, so gent ain mone vier wandel avf daz dienst, Alle wochen dreizzig phenning avch nevwer wienner. Savm wier aber, daz wier inner vier wochen weder wandel noch dienst niht gewen, der zv ein ander sehse schilling werent, so hab wier verloren allez vnser reht an dem selben leibgeding vnd schvllen sich di herren zv ier aigen sazehant ziehen mit vnserm guten willen also, daz sev dar zve niht fodern schvllen weder rihter noch geriht. Wer aver iemmen, der in des gewaltichleichen vor wer, so schol mein herr von Schavmberch, in des Grafschaft daz aigen leit, dem gotshavs daz selbe aigen scherm vnd frein vnt swenn wier paidev nimer sein, so hawent weder vnser erben noh dehainer vnser paider vrevnt fverbaz mit dem aigen niht mer ze schaffen. Wier hawen avch gelobet, daz wier daz selb aigen weder mit satz noch mit verchavfen nindert verchvmbern schvllen an der herren willen vnd an ir vrlaub. Vnt daz di red also stet peleib, gib ich vnd mein havsfrav denselben herren disen prief versigelten mit meins herren insigel von Schavmberch vnd mit dem meins swehers heren hertneides von Lihtenwinchel insigel vnd mit dem mein selbes insigel. Des sint gezevg meins swehers svn Ott vnd Pernhart, her Wernhart von Rotenvels, her Rvdolf der Schiver, her Sighart von Grveb, her Hainreich von Harthaim, Wernhart der Weikkinger vnd ander piderlevt genvech. Der prief ist gigewen, do von Christes gepvert waren vergangen drevtzehen hvndert iar, darnach in dem sibentzehenten iar an sand Bartholomes tag.

Source Fulltext: OÖUB 5 (Wien 1868), S. 199-200, Nr. 200