Reuerendis in christo patribus dominis et amicis suis karissimis dominis Wisentoni venerabili preposito, Dietmaro decano Totique collegio Ecclesie Sancti Johannis in Walthusen Heinricus diuina miseracione prepositus, Chunradus decanus Totusque Conuentus Ecclesie Sancti ypoliti cum deuotis orationibus sinceram et fraternam in domino karitatem. Pensantibus nobis et animo sollicite reuoluentibus, quod vita hominum velut nuncius precurrens et tamquam vmbra transeat sitque velut nauis, cuius vestigium in aquis fluctuantibus non cognoscitur et tamquam auis aera transuolans, cuius itineris argumentum penitus ignoratur ita, ut homo iam floridus et amenus in ictu oculi, velut lanugo, que flatu venti tollitur, et tamquam fumus diffusus in nichilum quodammodo redigatur nec sciri possit, quis nostrum dignus sit odio vel amore, visum fuit nobis super omnia expedire, vt viri spiritales, qui ea solum querere debent, que sursum sunt non que super terram decurrentia (?) vite sue tempora sic preordinent, sic prouideant, sic disponant, vt labore suo sic transitorio quietem perpetuam valeant emercari. Adquod utique fiendum nichil adeo credimus profuturum, quam ut fusis per inuicem piis obsecracionibus placabilem sibi reddant supernum iudicem, qui in ira misericordie recordatur. Si enim secundum statum exterioris hominis, qui sibimet quodammodo prestare potest amminiculum in karitate iubemur documentis inuicem apostolicis supportare, videtur opportunius et multo saluti congruencius, vt interior homo noster, qui disiunctus a corpore nichil sibi prodesse poterit, bonorum operum exerciciis et karitatis orationum suffragiis adiuuetur. Cum igitur religiosorum Ecclesie federe singularis dileccionis adunate vigili cura semper ad hoc intendere debeant, vt qui nexu carnalis amoris hic fideliter coniunguntur, solutis eciam corporibus in spiritu feliciter congregentur. Ecce nos iuxta salubrem aliorum ordinum consuetudinem ad vnionem nostre fraterne fidei vos recipientes decreuimus vobis cunctisque vestris successoribus tam in vita quam in morte plenum dare participium omnium piarum accionum, que per nos exnunc et in antea operata fuerit clemencia saluatoris. Adhuc nichilominus vobis astringi uolentes, vt siquis confratrum vestrorum fraterni amoris gratia vel alio quocunque casu Ecclesiam nostram uisitare uoluerit, in infirmitorio vel alias, vbi prelato placuerit, se recipere debeat prebendam ibidem, que fratribus nostris ministrari solet, integraliter percepturus, nisi forte ipse prelatus hospitalitatis gratia vberiora sibi karitatis beneficia in mensa propria voluerit exhibere. Statuimus eciam, vt, cum vestri consortij aliquis vocante domino decesserit, sacerdotum Camerarius vel alter habens ordinare de vestibus mortuorum diem obitus eiusdem nostro Monasterio precio baioli de vestibus ipsius defuncti recepto debeat intimare. Prepositus vero et decanus audita morte fratris defuncti mane Capitulum conuocabit et lecta littera coram eis vniuersi Capitulares pro absolutione eiusdem fratris disciplinam recipiant corporalem dicendo interim illos psalmos, qui pro nostris fratribus et benefactoribus dici in Capitulo consueuerunt. Qui autem Capitulares non fuerint siue Clerici vel Conuersi de manu Decani finito Capitulo similem recipiant disciplinam. Quo facto ipse Decanus nomen defuncti libro ascribi faciet mortuorum. In eadem eciam nocte, si festum non impediat, cum sollempni conpulsacione maiores vigilie cantabuntur et missa in mane conmuniter pro defunctis singulis etiam sacerdotibus missas nichilominus legentibus in sequesto(?), Quod si forte aliquem eodem die ex casu abstinere contigerit die, que proximo sibi vacauerit, supplere tenebitur, quod neglexit. Si autem festum aliquod interueniens in ipsa nocte, qua mors defuncti nunciata fuerit, vigilias impediat siue missam, fiet nocte, que vacauerit subsequenti. Infra cuius trecennarium quilibet nostrorum sacerdotum tres Missas pro defuncto tenebitur celebrare. Alii vero sacerdocii caracterem non habentes vnum legent psalterium, Conuersi autem et sorores trecenta dicent Pater noster Salutacionem beate virginis cuilibet adiungentes. Item si aliquis vestrorum confratrum infra Sacerdocium constitutus aut certe Conuersus uel soror viam vniuerse carnis fuerit ingressus nunciato nobis eiusdem obitu quinque psalmi consueti cum collecta pro requie ipsius in Capitulo dicentur fietque eadem nocte in vigilijs et in mane in Missa ipsius commemoracio specialis. Sacerdotum autem quilibet vnam infra Ebdomadam proximam, nisi legitime prepeditus fuerit, dicet missam. Alij vero infra sacerdocium existentes pro eodem legent vigilias Conuersis et Sororibus adiuncta Salutacione beate virginis Centies dicentibus Pater noster. fratres eciam vestros et benefactores defunctos a tam salubris statuti gratia nolentes excludere, Missam vnam defunctorum premissis maioribus vigilijs et sollempni conpulsacione pro omnibus eisdem in vigilia beati Andree Apostoli statuimus annis singulis celebrandam, in quo eciam die, vbi uidelicet fieri solet memoria mortuorum, kalendario sic volumus annotare: Commemoracio confratrum et sororum de congregacione Ecelesie Sancti Johannis in walthusen defunctorum. verum cum et nos adhuc in carne viuentes diuine bonitatis misericordia simus egentes, vt Status nostrarum Ecclesiarum tam in rebus quam eciam in personis saluus et incolomis (sic) deoque placitus perseueret, placet nobis, vt quilibet sacerdos nostrorum Conuentuum Tres Missas, vnam de sancta Trinitate, alteram de beata virgine, terciam de Omnibus sanctis, ita ut hec collecta: Deus qui karitatis dona, prime semper collecte sub vna iungantur (sic) conclusione, infra aduentum dominj deuote et inpretermisse perpetuo debeat celebrare. Constituti vero infra Sacerdocium vnum legant psalterium Conuersi quoque et Sorores per singulas ebdomadas aduentus domini, cum salutacione beate virginis dicant Centies Pater noster; et ne quispiam nobis succedencium de ignorancia huius religiosi voti valeat excusari, ipsam formam comprimisse fraternitatis libero regule annotari fecimus in die, qui vigiliam Sancti Andree precedit in nostris Capitulis annis singulis pro lectione regule recitandam nichilominus hoc addentes, quod siquis de nostris consorciis ductus desidia huius laboris socius existere noluerit, sit eciam a gracia, que sequitur, penitus alienus sic, vt nomen eiusdem alteri Monasterio, cum obierit, non scribatur sed proprie Ecclesie tantummodo sit contentus suffragijs. Si vero aliquis ad patranda premissi laboris onera sese obligauerit et per effectum id ipsum explere non curauerit vtpote delusor fraterne fidei, cum dathan et abyron sorbeatur, Ne ergo eiusdem confraternitatis salubre decretum ac vinculum indissolubile aliquo malignitatis scrupulo a quibusquam nostris successoribus infringi siue violari possit, formam dicte confraternitatis vestro reponendam Sacrario in scriptis redegimus nostrorum Sigillorum munimine firmiter con munitam. Acta sunt hec in Ecclesia Sancti ypoliti anno domini Millesimo Trecentesimo vicesimo Septimo, vl. Idus Julij.

Source Fulltext: OÖUB 5 (Wien 1868), S. 485-488, Nr. 489